Shillong, Jylliew, 11: Ki nongtrei All Meghalaya SSA Non-Teaching Staff Association (AMSSANTSA), ki la ai por 15 sngi ia ka Sorkar Jylla ban pyntreikam noh ia ka jingsiew tulop ba thymmai.
Ka AMSSANTSA kala byrngem ba lada ka Sorkar Jylla bad ka tnat Pule Puthi kim lah ban pynurlong iaka jingdawa, kim banse ban mih paidbah sha surok ban pynlong da ka jingiakhih kynthup ka jingshah thngan.
Haba iakren shaki lad pathai khubor, ka President jong ka AMSSANTSA Kong Jennifer J. Synrem ka la ong “Lada jia ba ka Sorkar Jylla bad ka tnat Pule Puthi kim lah ban pyntreikam noh ban siew ia ka tulop ba thymmai kin sa shim da kiwei pat ki lad ki lynti ba tyngeh pyrshah ia ka Sorkar”.
Ka Kong Jennifer kala ong ba kane ka jingdawa jong ka Association ka long halor ka jingkiew dor jong ki mar ki mata, ki marbam mardih ha iew ha hat kat haduh ba ka ktah ia ka pla iarong namar ka jingrit ka tulop kaba ki ioh mynta.
U General Secretary ka Association Bah Barikupar Mylliemngap u la kyrpad ia baroh ki nongtrei kiba don sha kylleng ki district ka Jylla ba kin long kiba la pynkhreh ban mih paidbah lada ka Association khot pynlong ia ka jingiakhih ba jaijai katkum ka riti synshar paidbah ha kano kano ka por.
