Shillong, Jylliew 3: U Deputy Commissioner ka East Khasi Hills uba long ruh u Returning Officer jong ka Shillong parliamentary constituency u SC Sadhu hynne ka sngi nyngkong, ula pynpaw ba ka jingiaid proseshon bad rally ba jop elekshon, kam dei ban pynthud ia ka shongsuk shongsain̈ ha ka jingniew vote.
Haba iakren bad ki nongthoh khubor hadien ka jingwan jurip ia ka jaka niew vote ha Shillong, u SC Sadhu ula ong ba ki bor District kila pynkhreh ia baroh ki jingdonkam ban pynthikna ba ka jingniew vote kan long kaba iaid beit iaid ryntih bad kaba khuid ba suba da kaba pyndon bynta lang ia baroh ki seng saiñ pyrthei.
Na ka bynta ka shongsuk shongsaiñ ruh la pynkhreh bha ia ki bor pahara ban pynthikna ba ki briew ki bym ioh jingbit, kin ym ioh ioh rung sha ka jaka niew vote.
“Watla ngi la pynjynsur ia ki kyndon jongka 144 CrPC ha kaba iadei bad kanjingiaid rally bad proseshon, ia kiwei pat ki kyndon kin treikam beit ban pynthikna ha ka jaka niew vote” ong u DC.
U DC ula ong, “Hadien ba la pynmih ia ka hukum, bun ki kynhun kynthup ia ki seng saiñ pyrthei, sengbhalang bad ki nongialam shnong, kila ai ia ka dorkhas ba kyntu ia ngi ban pynjynsur ia ki kyndon ha kaba iadei bad ki rally bad proseshon bad hadien ka jingiasyllok bad baroh, ngi la pyrkhat ban pynjynsur noh bad ha kajuh ka por ngi kyntu ia ki ba kin pynthikna ba ka jingiaid proseshon bad rally kim dei ban ktah pat ia ka shongsuk shongsaiñ”.
Ula ong ba ki kyrtong bad ki seng saiñ pyrthei kila pynthikna ia ngi ba kin shim ia ki lad ki lynti ban ym pynmih ia kino kino ki huri hura na ka jingiaid rally.
“Ngi lah iasyllok bad ki seng saiñ pyrthei bad ki kyrtong kiba iakhun ia ka elekshon bad ka jingbthah kadei ba kin ai lypa ia ngi ia ki jaka kaba kin iaid proseshon bad kidei ban buh bun ngut ki Volunteer na ka liang ka jongki bad kidei ban batai bniah ia ka kynhun ka jongki haba ki pynlong ia ka jingiaid proseshon bad rally ban pynthikna ba kim dei ban pynwit ia kiwei pat bad kim dei ban pynmih ia ka huri hura kaban ktah ia ka shongsuk shongsaiñ” ong u DC.
