Shillong, Jylliew 02 : Katto katne bynta jong ka kynroh ka PA Sangma Sports Complex kaba don marjan ka Sewage Treatment Plant bad Indoor Hall 2, kaba dang shu dep tei dang shen, kala khyllem hynne ka step sngi U Blei.
“Ka jingkhyllem jong kane ka kynroh ka khlem ktah pat ia ki jingtei kiba kongsan jong ka Stadium” ong ka Director of Sports & Youth Affairs Kong Isawanda Laloo ha ka kyrwoh.
Kala pyntip ba la bthah ia ka kompani Hindustan Steelworks Construction Ltd (HSCL) kaba pyntrei ia ki jingtei jong kane ka Sports Complex, ba kan aiti ia ka kaiphod kaba bniah halor kane ka jingjia.
Ka Kong Isawanda ka ong ba ka jingther u slap kala wanrah ia ka jinglanglum bad pynshlei ia ka nala kaba la buh. Kane ka nala ka dei kaba la buh ban pyntuid ia ka um, ki jakhlia naka STP Tank, Indoor Hall 1, Indoor Hall 2 bad ka Complex.
“Hynrei, namar ka jingtrei ia kine ki jingtei ki dang iaid shakhmat, ym pat shym la lah ban shna pyndep lut pura ia kane ka nala bad kane kala pynlong ia ka jinglang ka um na u slap bad wanrah pat ia ka jingkhyllem kane ka kynroh” kala ong.
Haba pynpaw ba kane ka kynroh kaba khyllem ka dei kaba shu shna shipor ban phiah pud bad khang lad ia ka jingkyntur jaka, kala ong ba kiwei ki jingtei ha kane ka jaka ki dang iaid shakhmat bad ia ki jingtip ba kham bniah yn sa ai hadien ba ka Ophis kala ioh ia ka kaiphod na ka kompani ba pyntrei ia ka project.
Ha kajuh ka por, ka Kong Isawanda ka pyntip ba ki bor District ka West Garo Hills kila shim mardor ia ki sienjam ki ban pynthikna ia ka jingshngain jong ki nongshongshnong ka thain.
Kawei ka longiing kaba la shah ktah na ka jingkhyllem jong ka kynroh, la pynkynriah bad ai ia ki lad jing iarap ba kynthup ia ki jaka sah, ki marbam bad baroh ki jingdonkam,kala ong.
