Nongpoh, Jylliew 02 : Ka kur Nongrang jong ki Lai Kpoh, kiba dei na ka kpoh jong I Kong Thiabon Nongrang, ha ka sngi Saitjain, kila pynkup burom ia ka Kong Idashisha Nongrang, kaba dei ka Longkmie Khasi ba nyngkong eh ban ioh bat ia ka kyrdan Director General of Police (DGP) ka Jylla Meghalaya.
Ia kane ka jingialang pynkup burom la pynlong ha ka Iing ka kong Marbha Nongrang kaba don ha Umdir, Ri-Bhoi District ha kaba la wan iadon ryngkat naduh ki nongialam ka Kur Nongrang ba kynthup ia ki Rangbah Kur Bah Switbert Nongrang bad Bah Diwarson Nongrang lem bad kiwei kiwei.
Ki Nongialam ka Kur kila pynpaw ia ka jingkmen bad jingsngew sarong halor ka jingshah thung ka kong Idashisha ha katei ka kyrdan bad pynpaw ba kane ka long ka nuksa ia kiwei pat ba lyngba ka jingtrei shitom bad trei minot, kam don kano kano ka jingeh ka ban khang lynti ha ka jingim.
Kine ki Nongialam Kur kila ai ruh ia ki kyntien sneng kraw ia ka Kong Idashisha da kaba ong ba wat hapdeng shibun ki jingtynjuh ki ban wan ha ka jingshakri ia ki paidbah, kadei ban iai kynmaw ia U Blei, ban pan ia ka jingshemphang, ban trei ha ka lynti jong ka hok bad ka jingshisha, ban weng ia ki jingsniew kiba wan lynshop ha ka Jaidbynriew bad ha ka Jylla baroh kawei.
Na ka liang jong ka Kong Idashisha Nongrang pat haba ai jingkren ha kane ka sngi, ka la pynpaw nyngkong eh ia ka jingsngewnguh sha ka Kur kaba la shim ia kane ka sienjam ban pynkup burom ia ka, wat lada na ka liang ka jong ka, kam shym la kwah satia ban shah pynkup burom.
Ka la ong ruh ba kam shym poi pyrkhat satia ba kan lah ban poi shaduh kane ka kyrdan kumba ka long mynta da kaba pynpaw ia ka jingsngewnguh sha uwei na ki bahaing uba ju ai mynsiem bad pynshlur ia ka bad ruh khamtam ia U Blei ba dei lyngba ka jingkyrkhu bad ka jingialam lynti ka jong U ba ka sa lah ban poi sha kane ka thong.
Ha kane ka sngi, na ka liang jong ka Kur kum ka dak jong ka jingpynkup burom ia kane ka longkmie kaba wanrah ia ka nam bad burom ia ka Kur bad ka jylla hi baroh kawei, ka la ai sngewbha da ki jain ryndia, ki syntiew bad ruh da ka memento.
