Shillong, Jymmang 29 : U Myntri ka tnad Pule Puthi Rakkam A Sangma hynne ka sngi Balang, ula pyntip ba ki don hapdeng 40-50% ki samla pule ka Jylla kiba khlem register ban ialeh ia ka eksam Common University Entrance Test-Under Graduate (CUET-UG) ba long dang shen ha Jylla.
“Hapdeng 6000 haduh 7000 ngut ki samla kila iakhun ia ka CUET-UG hynrei bun bha ki ba khlem register satia. Hapdeng 40-50% ki samla ba pass ia ka klas XII ki khlem register ia ka eksam CUET mynta u snem. Kane ka dei namar ka jingbym biang ki jingpyntip, jingbym biang ki jingpynshai hynrei nga ai jingmut ia ki samla pule ba kin lum jingtip bha bad tip ia kaei kaba jia hapoh ka Ri” ong u Rakkam haba iakren bad ki Nongthoh khubor.
U Myntri ula pyntip ruh ba ha kine ki lai snem bala leit noh, ka Jylla kala lait na ka eksam CUET bad ong “ Nga kwah ban pyntip sha phi ba ha ki snem ban wan, ngin ym don nongrim shuh ban pan pyllait biang ia ka eksam. Ia ki College khamtam kito kiba iadoh bad ki Central University, kumta, ki samla pule bad ki jaka pule kin hap long kiba la pynkhreh, ban tip bha ia kiei kiei baroh bad ban register ialade ban ialeh ia ka eksam CUET khamtam ia kito kiba kwah leit rung klas ha ki college ba iasoh bad ki Central University”.
U Myntri ula ong, haba iadei bad ka Jylla Meghalaya, ka Jylla kala don mynta ia ka State University bala tip kum ka Captain Williamson Sangma State University, bad kito ki jaka pule kiba kwah ban iasoh bad kane ka University kila don bun bad ki kam ki jam kila iaid shaid shaid.
 ba long dang shen ha Jylla.){kind=link}