Shillong, Jymmang 28 : Ka Sorkar Jylla kala rai ban pynkhlain ia ka jingdon jong ki Village Defence Party (VDP) ha ki jaka bala ithuh kum ki jaka ba jyllei u droks khnang ban lah rat naduh dyngkhong ia ki jingdih pynbuaid ha Meghalaya.
Ia kane ka rai la shim ha ka jingialang bala pyniaid da u Myntri ka Tnad Social Welfare Bah Paul Lyngdoh hynne ka sngi Ba-ar ha ka jingiadonlang ki Heh Ophisar ka Tnad kam Pohiing, Social Welfare bad ki Seng trei mon sngewbha bapher bapher ha ka jingiakhun pyrshah ia u droks.
Haba kren sha ki lad pathai khubor, u Bah Paul ula iathuh ba la pynlong ia ka jingialang ban shong bishar kam halor ka jingiaid jong ka Drugs Reduction Elimination and Action Mission (DREAM), ki kam kiba la leh bad ruh ka jingphai khmat sha ki sienjam ban sa shim ba kumno yn leh eiei halor ki jingduna kiba mih ha ka jingiakhun ia u droks.
Haba kylli halor ki sienjam ba shipir ban leh eiei halor kane ka kam, u Bah Paul ula ong “Kawei na ki kam bala iakren ka long halor ka jingpynkylla bad jingpynbeit thymmai bad ruh ban khmih ia ki lad ki lynti ha kaban pynbeit ia ki Village Defence Party (VDP) khamtam ha kaban ithuh ia ki jaka ba jyllei u droks hapoh ka Nongbah Shillong”.
“Kawei na ki mat ba sngewkhia eh ia ngi ka long halor ka jingdonkam ban pynlong ia kane ka prokram kaba iadonbynta lang ki Shnong. Ngim kwah ban iohi ba ka DREAM kan dei tang ka sienjam ba shim da ka Sorkar. Ka long kaba kongsan ban ratdyngkhong ia u droks bad jingdih buaid, ngi donkam ia ka jingiasnohkti lang ki nongtrei mon sngewbha ha ka imlang sahlang” ula bynrap.
U pyntip ba ha ki artylli ki jingialang bad ki Dorbar Shnong, kala mih ka sur ba ki Shnong ki kwah ban iadonbynta lang ha kaban ithuh bad ruh ban iakhun ia ki jingktah jong u droks.
“Kumta, ka jingiakren mynta ka sngi, ngi la pynleit jingmut eh sha ka lad ka lynti ban pynkhlain ia ka jingdon jong ki VDP ha kylleng ki jaka jong ka Jylla” ula ong.
Haba kren halor ka Ain, u Myntri ula ong ba ka dei ka kamram bad ka bynta jong ka VDP ban iarap lang ia ki Pulit ha ka ban tehlakam ia ka shongsuk shongshngain, ka jingsuk haba donkam bad ruh ban iaid pahara ha ki shnong ki thaw ban khanglad ia ki kam tuh kam thiem, kam runar bad kiwei ki kam bymman ban iada ia ka jingim ki paidbah bad ki nongkynti.
“Kumta, u drugs u wan lang ha ka bynta bad ka kamra jong kine ki VDP ban leh eiei” ula ong haba bynrap ba ka Sorkar kan sa ai ia ki jinghikai ia ki VDP kumno ba kin leh haba iadei bad u droks.
“Shen ngin sa khot ia ka jingialang ba kynthup lang ia baroh ki Dorbar Shnong ka ban sdang shuwa nangne na Nongbah Shillong” ula ong.
