Shillong, Jymmang 27: U Adonijah Lyngdoh ula rah ia ka nam lahduh ha ka “Hills on a Plate – Meghalaya” Season 1 kaba dei ka Serial TV jong ka jingiakob shet jingshet ha ryngkat bad ka jingpyninam ia ki kolshor ba phylla jong ka jylla Meghalaya.
Ka jingjop u Adonijah ha katei ka jingiakob ym tang kala kyntiew ia ka kyrdan ka jong u kum uta u nongshet ba pawnam ha ka kam shet jingshet hynrei kala pyni ruh ia ka jingskhem jingmut bad ka jingtrei shitom ha kaban iakhun ia ki jingeh ha ka jingim ka jongu.
U Adonijah ula iakhun ha ka jingim kum u khynnah u bym don kmie don kpa shuh hynrei ula mad iaka jingjop ha ka jingiakob shet jingshet bad kane ka jingiaid lynti u Adonijah ka pyni ruh ia ka nuksa ba ka don ka bor jongka jingkylla lyngba ka jingtrei shitrhem bad ka jingskhem mjingmut
Katei ka prokram, kala khring ia ki nongpeitkai na kylleng ki jaka bad ki ri bad la pyni ia ki jingphylla ha ka rukom shet rukom tiew, ka jingwad bniah iaka kolshor bad ki jingiathuh
khana kiba sngewtynnad na ka jylla Meghalaya. Haba u Adonijah ula iohrah shala iing ia katei ka khusnam, ula ai mynsiem pat ia ki nongpeitkai lyngba ka jingtrei shitom bad ka sap ka phong shet jingshet ka jongu.
Ki 5 ngut ki nongshet jingshet kila ioh pdiang mar T.10,00,000 na ka Meghalaya Tourism ban ai mynsiem ia ki ba kin bteng ia ka kam shet jingshet ka jongki bad ban pyniaid shakhmat ia ka jingthmu ka jongki ha kaba iadei bad ka kam shet jingshet.
Ia katei ka song tyngka la aiti sha ki nongiashimbynta, da u Dr. D. Vijay Kumar, Commissioner and Secretary ka Meghalaya Tourism ha ka jingialang jong ka Public Screening jong ka “Hills on a Plate Episode 1” kaba la long ha u bnai Lber mynta u snem ha Lariti Auditorium.
Ia katei ka prokram la pyniaid da u Gordon Thabah bad Abigail Kaizun bad ka “Hills on a Plate – Meghalaya” kala wanrah lang ia ki kynhun bapher jong ki nongshet kiba don sap don phong kiba kynthup ia u Uttam Thangkhiew, Artet Kharsati, Ivan Suting, Nambie Marak, Tanisha Phanbuh bad ka Daeihunki Suchiang, kiba la pyni iala ka sap bad iaka jingtbit ha katei ka jingiakob.
Ka nongshet kaba pawnam ka Sarah Todd jongka Master Chef Australia, kala long ka nongbishar ha katei ka jingiakob bad kane kala nang pynshongkun shuh shuh ia katei ka prokram.
Kadei ruh kaba nyngkong eh na ka jingiakop shet jingshet ha ka thaiñ shatei lammihngi jong ka ri India bad ka “Hills on a Plate – Meghalaya” ym tang ba kala long ka jingrakhe ia ka jingshet ia ki jingshet tynrai jong ka thaiñ hynrei kala pyni ruh ia ka sap ka phong bad ia ki jingbam kiba bang jong ka Meghalaya sha ki paidbah jongka ri.
