Shillong, Jymmang 26 : Ka Meghalaya lem bad kiwei ki Jylla ka thain Shatei Lam Mihngi la khmih lynti ba kin ioh ia u slap uba jur u ba pynduna ia ka jingshit kyrang mynta ka sngi.
Ka Indian Meteorological Department kala antad ba kan don ka jinghap slap uba jur ha ka thain ha kine ki lai sngi ban wan, kaban sdang naduh mynta ka sngi U Blei ka 26 tarik Jymmang.
Ka Regional Office ka IMD ha Guwahati, kaba pynbna da ka ‘Orange Alert’ ia ka Meghalaya, Assam, Tripura, Manipur, Nagaland bad ka Mizoram ha ka 26 tarik kata mynta ka sngi. La khmih lynti ba kan don ka jingther u slap u ban wan ha ryngkat ka lyer kaba jur kaba iaid lynti hapdeng 30 haduh 50 kmph.
Ka Arunachal Pradesh kala don hapoh ka kyrdan Yellow Alert mynta ka sngi.
Ha kajuh ka por, ka IMD kala pynbna ia ka ‘Red Alert’ I aka Meghalaya, Assam, Tripura bad Mizoram lashai ka sngi kata la 27 tarik Jymmang. La khmih lynti ia u slap uba jur bha u ban wan ha ryngkat ka eriong ba iaid haduh 60kmph.
Kumjuh ruh ha ka 28 tarik Jymmang, la pynbna ‘Orage Alert’ ha ki 7 tylli ki Jylla ka thain Shatei Lam Mihngi ba kynthup ia ka Meghalaya.
Ha kajuh ka por, ka Tnad Meteorological kala pyllait khubor halor ka Cyclone Remal kaba khlain bha, kaba la iaid lynti mynta sha West Bengal.
Kala ong “Ka Cyclone Remal iaid mynta sha North Bengal bad ka jingjur ka lyer ka sa nang khlain shuh shuh katba ka dang iaid lynti”.
