Nongpoh, Nailar 09: U MLA ka Jirang Bah Sosthenes Sohtun ula kyrpad ia ka Sorkar Jylla ba kan pynioh noh ia ka jaka theh niut ne ka Solid Waste Management kaba biang ha Byrnihat, ban tehlakam ia ka jingbret satah ia ki jaboh jabain ha ka thain.
Kane ka jingkyrpad kala mih hadien ka jingjurip ia kiba bun ki jaka ha Byrnihat khamtam ha shilynter ka surok NH-6, kiba la kylla long jaka bret jaboh jong ki briew khamtam ki nongleit nongwan.
Ia kane ka jingjurip la pynlong ha ryngkat ki Nongialam Shnong ka thain Byrnihat, u MDC Bah Victor Rani bad ki bor pyniaid District, kiba la leit jurip kyrpang ia kawei ka jaka ha ka shnong Borbhuin kaba la satah bha da ki nuit ki nier bad bala pynmih ia ka jingsma iwtung ba shyrkhei.
U MLA ula pynpaw ia ka jingsngewkhia kaba jur halor ka jingbret pathar jong ki paidbah ia ki jakhlia khamtam ha ka thain Borbhuin kaba don harud ka surok NH-6, kaba la pynisaitmet ia ka jingkynton ka jakhlia ha kane ka jaka.
“Ngi la rai ban phah noh da ka jingthoh sha ka Sorkar Jylla ba kan pynioh noh da ka jaka theh niut kaba biang ha ka thain Byrnihat” pyntip u Bah Sosthenes.
Une u MLA ula kyrpad ruh ia ki riew paidbah ba kin sangeh noh ia ka jingbret pathar ia ki jaboh jabain khamtam harud jong ka surok NH-6 jong ka thain Byrnihat.
