Nongpoh, Jymmang 20: Ki runar ki bym lah ban tip ki don katno ngut, kila prong jubor hynnin ka miet shiteng synnia jong ka 19 tarik Jymmang, hapoh ka State Bank of India, Umiam, kaba don ha ka thain ICAR da ka jingthmu ban tuh ia ka pisa bad ki jingdon ba remdor hapoh ka Bank.
Kat kum ka khubor ba ioh lum, ki runar kiba la shim kabu ia ka jingdum jong ka miet, ki ot ia ki grill jong ka jingkhang iit kaba don ha kyrpong ban ioh rung shapoh. Kine ki runar kila pyrshang ban kyndang ia ka drawer kaba buh pisa ha kane ka bank hynrei kila hap ban mih thylli namar ka jingbym lah plie satia.
Ia kane ka kam bymman la lap da ki nongtrei ka Bank hynne ka step sngi Nyngkong, kiba la pyntip mar mar sha ki Pulit ka Umiam Police Station ba kin wan leh ia kaba donkam.
Ki Pulit na Umiam Police Station lem bad ka kynhun Crime Branch, kila hiar sha katei ka Bank bad kila pynlong ia ka jingtohkit ban iohksai ia ki briew kiba donkti.
