Shillong, Jymmang 16: U Myntri Rangbah ka jylla u Conrad K Sangma hynne ka sngi Palei ula lum ia ka jingialang jong ka Climate Change Council ha Shillong ban khmih bniah halor ki prokram kiba pyntreikam da ki tnad sorkar bapher bapher.
Ka jingialang kala iatai sani halor ka jingiatreilang hapdeng ki tnad sorkar bapher bapher bad baroh kiba iadonbynta lang ban iada ia ki jingdon jingem ka mei mariang bad ban shimkhia halor ki bynta na ka jingshah ktah ha ka jingkylla ka suinbneng.
Ka Council kala iatai sani bha ia ki sienjam kiba la shim da ki tnad bapher ban iada bad ban pynkhie im biang ia ki tyllong um bad ban iada ia ki Catchment Area bad ka rukom pyniaid ia ki kam ki jam kiba iadei bad ki jingdon jingem ka mei mariang.
Ha kane ka jingialang la wan iashimbynta da u Myntri ka tnad PHE u Marcuise Marak, ka Myntri ka rep ka riang bad ka koit ka khiah ka Dr Ampareen Lyngdoh, u Myntri ka kam Bording u A T Mondal, u Myntri ka tnad Cooperation u Bah Coming One Ymbon, ryngkat bad ki heh ophisar na ka tnad Forest and Environment, Meghalaya Basin Development Authority, PHE bad kiwei kiwei.
Ula kyntu ia ki tnad sorkar ba kin shimkhia bha bad ban shim ia ki sienjam ba dei ban shim ha kaba iadei bad ka jingkylla ha ka suinbneng.
U Myntri rangbah Conrad Sangma ula ong, “Ka jingkular ka jong ngi ban pynneh pynsah ia ka mei mariang ka donkam ia ka jingiatreilang da ka jingitylli lang kawei. Da kaba iatreilang bad iatyllilang hapdeng ki tnad sorkar bapher bapher bad baroh kiba donbynta lang, ngin lah ban thaw ia ki lad ki lynti kiba biang na ka bynta ban ioh ia ka jingjyrngam bad ka lawei kaba shngain ia ka Meghalaya.”
Ka jingialang kala iengskhem ha ka nongrim jong ka sorkar ban shimkhia ia ki jingeh bad ki jingtynjuh kiba iadei bad ka mariang bad ban kyntiew ia ka roi ka par.
