Shillong, Jymmang 16: Ka Khasi Students Union (KSU) hynne ka sngi Palei, kala phah da ka dorkhas sha u Myntri ka pule puthi u Rakkam A Sangma, kaba pynpaw ia ka jingsngewkhia halor ka kynrum kynram kaba mih ha ka rukom pyniaid ia ka eksam Common University Entrance Test (CUET) hynnin ka sngi Balang hapoh ka Centre jong ka North-Eastern Hill University (NEHU).
Ha ka dirkhas, ka Education Cell jong ka KSU kala ong, “Ka dap da ka jingsngewkhia halor ka kynrum kynram bad ka jingjia ka bym itynnad kaba la sakhi haka por ba pynlong iaka eksam CUET-UG 2024 ha ka skulbah NEHU”.
“Kum ka Union kaba ieng na ka bynta ka bha ka miat bad ka hok jong ki samla pule, ka sngewkulmar jingmut halor ka jingdhoh ka rukom pyniaid bad ban pynbiang ia ki jingdonkam kaba la ilam sha ka jingeh kaba khraw ia kiba applai ne ki samla kiba ialeh ia ka eksamin” ong ka dorkhas bala soi da u Chairman samla Pynkmenlang Sanmiet bad u Secretary Shelkitbok Kharbani.
Ka KSU kala ong, ba ki samla kiba ialeh ia ka eksamin kila hap ban ap da ki kynta khlem kano kano ka jingbthah kaba biang ne kino kino ki jingthoh kiban kdew ne btin lynti ia ki ban poi sha ki jaka thoh eksam. Ka jingklumar jingmut kala nang jur haba ki Admit Card kiba la ai da ka NTA kala kdew ba ka jaka thoh eksam ka jongki kadei ha NEHU Cluster Building, hynrei ka NEHU kala buh ar tylli ki jaka thoh eksam ha ka Non-Science bad Science Cluster Classrooms, khlem da pyntip ha ka por kaba biang ia kiba ialeh ia ka eksam ha kaba ha kano ka Hall kin hap ban shong katkum u Roll Number uba la pynbeit.
“Ka jingpynslem ban pynlong ia ka eksam ha ka sobjek English namar ka jing bym treikam ka Biometric System, kala pynlong ia ki samla pule ba kin hap shah slap bad kala don ruh ka jingiakhynniat bad jingiatynruh kaba la neh slem bha, kaba la pynlong ruh ia bun ngut ki samla pule ban kyllon bad ban ioh ia ka jingsumar” la ong ka KSU ha ka dorkhas.
“Ka long kaba sngewlyngngoh ba ka eksam kaba dei ban long ha ka por 3 baje ym shim la lah ban pynlong ha kaba ki samla pule kila ioh rung ha ka jaka thoh eksam ha ka por 5.15 janmiet hadien ba ki bor pyniaid ka NEHU kila ioh jingbit naka NTA ban pynlong ia katei ka eksamin khlem da donkam shuh ban pyndonka mai ka Biometric Registration” la pynpaw ka KSU.
Ka KSU kala kyntu ia u Myntri ba un leh eiei mardor ha kaban pynthikna ba kum kine ki jingjia kin ym jia shuh, kaba kynthup ia ka jingpynbiang noh ia ki jingdonkam nadong hadong ban pynsuk pynaram ia ki nongialeh eksam.
