Shillong, Jymmang 16: U Nongtrei kam paidbah Cherian Momin ula ther tyngeh ia ki Pulit ka Assam halor ka jingkynnoh ba kila syntiat beain ia ki seng niam ki Khristan ha Assam.
“Nga pynrem jur ia ki kam jong ki Pulit ka Assam bad dawa ba dei ban sangeh noh mardor ia ka jingsyntiat beain ia ki seng niam ki Khristan. Ki borkhmih ki dei ban bud ia ki nongrim ka jingburom niam, ka jinglaitluid ban mane, bad kiwei kiwei kiba la pynkup bor da ka riti synshar ka Ri” ong u Momin ha ka kyrwoh.
Ula ong ba ka jingsyntiat bad lum jingkhein ia ki Institution ki Khristan, kaba la leh hapoh ka jingbthah jong ka Police Headquarter ka dei ka jingpynkhein ba pyllein pyllein ia ka hok bala pynkupbor da ka riti synshar ka Ri.
Ula bynrap ba ka United Christian Forum (UCF) kala kren ia kaba dei halor kine ki kam bym shong hok, kaba pynman ia ki kum ki ‘Nongsyntiat’ bad pynpaw ia ka jingsngewkhia halor ka jingpynrit mynsiem ia ki riewngeit baroh. Ka UCF kala phah ruh ia ka dorkhas sha u Deputy Commisioner ba dawa ban pynsangeh mardor ia kane ka kam ki Pulit.
