Shah ktah palat 200 ngut ki briew na ki bor ka mariang
Shillong, Jymmang 05: Ka jingther u lapbah, ka eriong bad u phria hynne ka sngi u Blei, kala pynjulor ia palat spah tylli ki iing ki sem ha kylleng ki jaka jong ka West Khasi Hills, Eastern West Khasi Hills bad ha East Khasi Hills District.
Ia kane la pyntip da ka Secretary ka tnad Revenue & Disaster Management, Kong Matsiewdor War Nongbri.
Kat kum ka jingiathuh kane ka Heh Ophisar, ki don 6 tylli ki shnong ha Eastern West Khasi Hills District kiba la shah ktah na ka jingwan lynshop u lapbah, ka eriong bad u phria, ha kaba 62 tylli ki iing kila shah pynjulor ha ka bor mariang.
Kine ki 6 tylli ki shnong ki kynthup ia ka shnong Nongkhlaw, Mawiongkhri, Nongthyllep, Mawnai, Umshyiap, Phudbah bad ka Demdngiem.
Ka iathuh ba ha kane ka jingwan lynshop ki bor ka mariang, ki don haduh 172 ngut ki nongshong shnong kiba la shah ktah jur ha Eastern West Khasi Hills District.La iathuh ba palat 50 hectare ki jingthung jingtep kila shah pynjulor ha une u slap uba wan ha ryngkat ka eriong bad u phria.
Nalor kane, ka eriong kala pynjulor ruh ia 21 tylli ki Iing ha ka shnong Mawlynrei kaba hap hapoh ka Mawryngkneng Block jong ka East Khasi Hills District.
Kane ka eriong kala lynshop tyngeh ha West Khasi Hills ha kaba la don palat 200 ngut ki briew kiba la shah ktah bad 52 tylli ki Iing kila julor.
Halor kane, ka Kong Matsiewdor ka pyntip ba ka eriong kala lynshop ha ka shong Malangkhasi, Malangkona Circle ha ka por 9:30 baje mynstep bad ha kane ka thain, 5 ngut ki briew kila shah ktah ba kynthup ia 2 ngut kiba la heh bad 3 ngut ki khynnah.
Ka pyntip ba kane ka eriong bad u slap uba wan lang bad u phria, kila ktah ruh ia kiba bun ki Circle ka Nongstoin Block ba kynthup ia ka Mawlieh Circle, Byrki Circle, Mawthor Circle, Mawlangsu Circle bad Mawdoh Circle.
Ka iathuh haduh 52 tylli ki Iing kila shah pynjulor ha Nongstoin Block bad ki nongshongshnong kiba shah ktah ia 135 ha Mawlieh Circle , 45 ngut ha Byrki Circle, 15 ngut ha Mawthir Circle, 15 ngut ha Mawlangsu bad Mawdoh Circle ki don haduh 40 ngut.
Kane ka Heh Ophisar ka pyntip ba ki Deputy Commissioner bad ka DDMO kila shimkhia mynta ban ai jaka sah ia ki briew kiba shah ktah.
