Shillong, Jymmang 05: Da ki spah ngut ki khynnah bad ki samla pule jong ka thaiñ War Jaiñtia, kila wan iashimbynta ha ka Career Guidance Counselling kaba la pynlong da ka KSU-War Jaiñtia Circle ha ka sngi Saitjaiñ, ha Amlarem.
Ha kane ka prokram, la wan ai jingkren bad jinghikai da ki Assistant Professor kiba kynthup ia i Dr. Chanlemki Lanong, Dr. Kermi U Tariang, Bah Sashi Teibor Laloo, Kong Badapbiang Dkhar Tariang bad u Bah Batkupar Nongkhlaw.
U President ka KSU War Jaiñtia Circle u Samla Lop Khonglah ula pyntip ba ha kane ka Career Guidance Counseling la ai jingpynshai ia ki khynnah pule ha kaban jied ia ki laiñ pule ha ka Arts Science & Commerce bad kiwei kiwei ki lain pule.
Nalor katei, la ai jingpynshai ruh haba iadei bad ki Competitive Exams kum ka UPSC, MPSC, SSC bad kiwei kiwei.
Ka KSU ka ai khublei ia baroh kiba la wan ban shimbynta ha katei ka prokram, ki kmie ki kpa jong ki khynnah pule bad ia baroh kito kiba la ai jingkyrshan ia ka seng ban pynlong ia katei ka prokram.
Ha kawei pat ka liang, ka KSU ka kitbok kitrwiang ia baroh ki khynnah pule ka bri u hynñiewtrep kiba ap ia ka Result Matric bad Klas XII ban kin ioh kheit ia u soh jong ka jingtrei shitom bad ban minot khop ha ka jingpule ka jongki.
