Shillong, Jymmang 05: Ki jaidbynriew Kuki-Zo kiba shong basah ha nongbah Shillong ha ka 3 tarik u Jymmang kila rakhe ia ka “Awakening Day”, kum his bynta ban kynmaw ia ka jingdap shi snem jong ka jingiakynad bad ka jingshah thombor ki Kuki kaba la sdang ha ka 3 tarik u Jymmang 2023.
Ia kane ka jingialang la pynlong da ka Kuki Inpi Meghalaya bad Kuki Students Organisation, Shillong ha Kuki Worship Service, Church Complex, Lumbatngen, Madanryting, Shillong.
La wan ban iashimbynta ha kane ka jingialang da ki nongialam na ka jaidbynriew Kuki-Zo kiba kynthup ia ki Kuki, Mizo, Hmar, Paite, Vaiphei, Gangte, Zou, Simte, Tidim-Chin bad kiwei kiwei bad la wan ruh ban iashimbynta da hajar ngut ki jaidbynriew Kuki-Zo kiba shong basah ha kylleng jongka nongbah Shillong.
La pynlong ia katei ka jingialang da ka jingthmu ban kynmaw burom ia ki spah ngut ki mynsiem briew kiba lui lui kiba la khlad noh na ka jingiakynad bad na ka jingshah thombor bad la pynlong ia ka jingsngap jar kaba shipor ban leh burom ia ki lanot Kuki-Zo kiba la duh noh ia la ka jingim na katei ka jingiakynad.
U S Touthang, President ka Kuki Inpi Meghalaya, haba ai jingkren ula pynkynmaw ia ka jingialang ba ha ki 12 bnai kiba la dep jong ka jingiakynad, ka jingiap jong ki Kuki-Zo kala kiew sha ka 185 ngut ha kaba 200 tylli ki shnong bad 7,000 tylli ki iing kila shah pynjulor lut nadong shadong. Nalor kane palat 360 tylli ki jaka mane Blei kiba kynthup ia ki iingmane kila shah wiangding bad kane kala lam sha ka jingduh jaka shong jaka ia palat 40,000 ngut ki briew kiba don ha ki palat 200 tylli ki Relief Camp. Palat 100 tylli ki skul kiba dei ki jongki jaidbynriew Kuki-Zo kila shah pynjot bad shah pynjulor.
U Touthang ula pynpaw ba ka 3 tarik u Jymmang kadei kaei kaei kaban iai sah jingkynmaw shi rta kaba dei ruh kum ka sngi kaba la kyrsiew thiah syndon ia ki jaidbynriew Kuki-Zo.
Ula ai jingbatai ruh shaphang ka jingthaw ia ki Buffer Zone ne u pud u sam hapoh jong ka jylla na ka bynta ki ar tylli ki kynhun da u Myntri Kam Pohiing ka ri hapoh ka jylla Manipur ka long kaei kaei ka bym lah ban mutdur hynrei ka long ruh kum ka jingpdiang jong ka Sorkar India ba ki Meitei bad ki Kuki kim lah ban ia imlang shuh.
U Myntri Rangbah ka Manipur ha kawei na ki jingiakren bad ki nongthoh khubor ha Imphal Airport hadien ka jingialang bad u Myntri Kam Pohiing, ha kaba ula ong ba nangne shakhmat u Myntri Kam Pohiing yn khmih hi noh ia ka bha ka miat bad ka synshar khaddar ha ka jaka lum bad ma u (Biren Singh) yn peit ia ki jaka ha ri thor.
Halor katei, u Touthang ula batai bniah ia ka jingdonkam ban iada ia ka Buffer Zone/Frontlines kaba la thaw da u Myntri Kam Pohiing ka ri bad kumta ula kyntu ia baroh ki Kuki-Zo ban iatylli lang kawei ban lah ban pynurlong ia ka jingthmu ha kaba iadei bad ka kam saiñpyrthei da kaba ai nuksa ban ioh noh iala ka jongka bor synshar ne Separate Administration na ka sorkar kaba phaikhmat sha ki Meitei kaban long hapoh jong ka riti synshar jong ka ri India.
Ula banjur ia ka jingdonkam ban long kiba husiar bad kiba peitngor bha bad ban iada ia khyndew ka shyiap kaba la ioh pateng na ki longshwa manshwa ne Pupa Gam bad ban batskhem ha ka jinglong tynrai bad ha ka nongrim jong ka jaidbynriew. Kumta ka 3 tarik u Jymmang kadei ka “Awakening Day” ka long kaba iahap bha na ka bynta ki jaidbynriew Kuki-Zo.
Ia kane kaj ingialang la pynkut da kaba pynlong ia ka jingthang mombati kaba la ialam da ka Kuki Students’ Organisation Shillong.
