Shillong, Jymmang 02 : Ka Hynniewtrep Youth Council (HYC) ha ka sngi Palei, kala aipor shitaiew ia ki bor ka Sorkar Jylla ba kin pynlong ia ka jinghiar jurip ia ka jaka bad pynthikna bad ban kyndang ia ki iing ba shna be-ain na ka jaka kaba don ha Lum Survey.
Haba kren sha ki nongthoh khubor, u President ka HYC Bah Roykupar Synrem ula ong ba ia kane ka rai la shim hadien ba ki bor Disttict kila pynpaw ia ka jingbym lah ban leh eiei pyrshah ia ki nongsah beain ha katei ka jaka halor ka nongrim ba kane ka jaka ka don hapdeng ka jingiakajia bad baka kam ka dang don hapdeng ka jingbishar jong ka Iingkashari.
“Hynrei, ha ka jingtohkit jong ngi, la lap ba ki don 3 tylli ki mukotduma ba dang sahteng hapoh u District Judge, Shillong haba iadei bad ka eviction notice balaai sha ki 3 ngut ki briew, kiba shong beain ha ka jaka (kumba 200 haduh 500 sq ft marwei), hapoh ka kyndon 5 jong ka Public Premises (Eviction of Unauthorised Occupants) Act, 1971 bala ai da ka Estate Officer, Guwahati” ula ong.
“Ngi la iakynduh ruh ia uwei u briew uba la iohpdiang ia ka notice bad uba la ujor mukotduma pyrshah ia ka eviction notice bad ula kren shai ha ngi ba ka jaka kaba dang iaid mukotduma ka dei kaba rit bha bad kam don bynta bad ka jaka ba shong iing beain kiwei pat ki briew. Kumta, ka jingkylli ba kan long subjudice kam mih satia bad ki bor ba dei khmih ki lah ban pynlong ia ka jingkyndang ia kine ki iing bas ah beain” ula bynrap.
U Bah Roy Kupar ula ong ba halor kane, ka HYC kala rai ban thoh sha ka Deputy Commissioner ka East Khasi Hills, Defence Estate Officer, Guwahati bad sha kiwei kiwei ki bor khmih ban ioh jingshai bad ba kin leh eiei kloi noh pyrshah ia ki nongshong beain.
“Ngi dawa ruh ban pynlong ia ka jingleit jurip hi ha jaka/pynshisha ia ka jaka ba shna iing beain ha ryngkat bad ngi lem bad ki nongmudui ia ka mukutduma bala kdew haneng, hapoh ka shi taiew naduh mynta ka sngi, khnang ban lah leh ia kaba donkam ha kaban kyndang ia ki nongshong beain na kane ka jaka” ula ong.
“Lada ym lah, ngim don lad da kumwei pat hynrei ban leit jurip hi dalade ia kane ka jaka lem bad ki nongmudui mukotduma ha ka jingiadonlang ki lad pathai khubor khnang ban iatip ki paidbah” ula bynrap.
 ha Lum Survey kadei ban long hapdeng ka ophis DC, ka tnat Defence Estate Office (DEO), ka Shillong Cantonment Board (SCB), ki Pulit lem bad ka seng HYC.){kind=link}