Shillong, Jymmang 01: Ka Indian Mountaineering Foundation (IMF), New Delhi, kala thung ia u General Secretary ka Meghalaya Sports Climbing & Mountaineering Association (MeSCMA) samla Wallambok Lyngdoh ban long u Nongialam ia ka kynhun ki ban kiew ia u lum Mt. Tinchinkhang (6010 m) ha Sikkim Himalaya bala bei tyngka da ka IMF.
Nalor kane, ka IMF kala jied ruh ia 9 ngut ki nongkiew lum na ki 8 tylli ki Jylla ka thain Shatei Lam Mihngi ka Ri ba kynthup ia arngut na Meghalaya kata i samla Ngandarihun Sohshang iba sah ha Mawlai Nongpdeng bad u samla Rilang Dkhar uba sah ha Umshaken, Ri-Bhoi District.
Kane ka jingkiew lum kan sdang naduh ka 1 tarik Jymmang haduh ka 21 tarik Jymmang, pyntip ka MeSCMA lyngba ka kyrwoh bala pyllait hynne ka sngi Balang.
Mynta u snem, ka IMF kala thmu ban pynlong bad bei tyngka ia ka jingleit kiew lum ha ka sien ba nyngkong eh ha Sikkim Himalaya na ka bynta ki nongkiew lum ba dang khynnah jong ka thain Shatei Lam Mihngi ka Ri ha ryngkat ka jingiatreilang bad ka Indian Himalayan Centre for Adventure and Eco-Tourism (IHCAE), Chemchey, Sikkim, kala ong.
Ki Nongkiew lum ki ban iakiew ia u lum Mt. Tinchinkhang
1. Mr Wallambok Lyngdoh – Meghalaya
2. Mr Rilang Dkhar – Meghalaya
3. Ms Ngandarihun Sohshang – Meghalaya
4. Mr Sonam Gyatso Lepcha – Sikkim
5. Ms Neaha Rai – Sikkim
6. Ms Radha Khatri – Sikkim
7. Mr Maro Meto – Arunachal Pradesh
8. Mr Lalruatdika – Mizoram
9. Mr Yierhevitso Vakha – Nagaland
10. Mr Biplab Das – Tripura
Ha ka khyllipmat ba khatduh, arngut ki nongkiew lum na Manipur bad Assam kila kein noh ia ka jingiashimbynta.
