Shillong, Jymmang 01 : Ka Sorkar Jylla kala pynkhlain ia ka jingpahara ha Nongbah Shillong bad kumjuh ruh ha ki District headquarter ka Ri-lum Khasi Jaintia namar ka jingiai jia ki jingjia kawang petrol bomb ia ki nongkynti ka Sorkar kynthup ia ki Polit Station.
Haba iakren bad ki nongthoh khubor, u Deputy Commissioner ka East Khasi Hills SC Sadhu ula ong “ Ia kane ka kam ngi la ialam hynnin ka miet bad u Superintendent of Police ka East Khasi Hills. Ha ka jingshisha ngi la pynjanai bad pynkhlain bha ia ka jingpahara ha ka por mynmiet”.
Ula pyntip ba u Superintendent of Police ula pynkhreh ia ka plan ban tehlakam ia ka jinglong jingman ka suk ka sain hapoh ka Nongbah.
“Ngi la iakren ia kaei ka kam kaba ngi donkam ban shim bad ruh halor ka jingpynithuh ia ki briew kiba donkti (kawang petrol bomb) ban leh ia kine ki kam thombor bad ngin sa nang pyrkhat biang” ula bynrap.
Nalor kane, u DC ula pyntip ba ula dep phah ia ka jingbthah sha baroh ki Ophis Sorkar bad ki Tnad Sorkar ba kin long kiba husiar.
“Ngi la pyntip ia baroh ki tnad Sorkar ba kin buh iala ki jong ki kali bad ki nongkynti ha ka jaka ba shngain, khamtam ym ban buh ha jaka ba laitlan, khamtam ki kali Sorkar. Ngi la pynkhlain ia ki bor pahara bad ngi kyrmen ba ha kine ki shisngi arsngi ban wan, ngin sa lah ban pynjai jai noh khamtam iaka shongsuk shongshngain” ula bynrap.
Haduh mynta, haduh 7 tylli ki jingjia kawang petrol bomb kila jia ha kane ka shibnai bala leit noh. Kane ka kynthup ia ka jingkawang petrol hynne ka step phyrngap ia ka Sadar Police Station bad Rynjah Police Station nalor ka Ophis ka Meghalaya Government Construction Corporation (MGCC) kaba don ha Rilbong.
Ha ka 3 tarik Iaiong, ka Mawlai Police Station kala shah kawang petrol bomb bad hadien kane, sa ka kali ba synran ia u Hehduh ka NEEPCO kaba jia ha ka 24 tarik Iaiong ha Demthring, bud da ka Iingsah u Symbud Myntri Rangbah ka Jylla Bah Sniawbhalang Dhar kaba jia ha ka 26 tarik Iaiong bad ka jingkawang petrol bomb ha Jowai Police Reserve kaba jia hynnin ka 30 tarik Iaiong.
