Nongstoiñ, Ïaiong 30: U Deputy Commissioner jong ka West Khasi Hills District, u la pyntip ba ka tnad Social Welfare Meghalaya Shillong kan ai ka jingïarap kyrshan pisa kaba 32,000 tyngka ïa ki nongdih droks kiba kwah ban phah sumar bad ban ïa syllok shabar ka Jylla na ka bynta lai bnai kynthih.
U pyntip ba u Director ka Tnad Social Welfare u khot bad iawer ia ki briew kiba la ngop ha ka jingdih droks ba kin shim ia kane ka lad jingiarap ba ai da ka Sorkar. U pyntip pat ba kane ka song kan long tang ia ki briew kiba wan na ki longiing kiba duk kiba hap hapoh ka ‘Below Poverty Line’.
Ban ïoh ïa kane ka jingïarap pisa, ki nongpang ki dei ban pynpoi ïa ki shithi aplai sha ka ophis jong District Social Welfare Officer, ba la soi da u Medical Superintendent jong ka Hospital Sorkar ne District Medical and Health Officer, ka original Certificate na u Block Development Officer (BDO), ban pynshisha ïa ka kyrteng ka jaka shong jaka sah. Ïa ki jingtip ba kham bniah lah ban ïoh na ka ophis jong ka tnad Social Welfare.
