Nongpoh, Iaiong 28: Ka kynhun ialehkai Dubakh bad ka Monarch kila ioh rah ia ka nam kum ki Champion jong ka kynhun ki Kynthei bad Shynrang ha ka lympung ialehkai 4th Berchem Cup bala pynlong da ka Seng Samla Nongpoh Proper.
Ka kynhun ialehkai Dubakh kala ioh rah ia ka nam lahduh ha ka liang ki Kynthei hadien ka jingpynliem ia ka kynhun SYM da 67-50 basket.
Ha ki shynrang pat, ka kynhun Monarch kala ioh rah ia ka nam lahduh da ka jinglah pynliem ia ka Nongpoh da 100-64 basket.
Ia kane ka lympung ialehkai la pynhap pyrda hynnin ka sngi Saitjain da ki Nongialam Sengbhalang ka them Ri-Bhoi ba kynthup ia u President ka KSU-NKH Bah Ferdynald Kharkamni kum u kongsan, u President ka FKJGP-NKH Bah Luistar Lyngdoh bad President ka HNYF-Northern Region Bah Markus Marten kum ki symbud kongsan.
Haba ai jingkren, u Bah Ferdynald Kharkamni u la ban jur ba lada ki samla ki thrang ban nang kyntiew ia kane ka lympung ialehkai basketball ki dei ban don noh da kawei ka galary kaba paka bad ka basketball board kaba katkum ka juk kaba mynta bad ia kane lah ban pynurlong lada ki Bor pyniaid Shnong, ka Dorbar Raid Nongpoh lem bad ki Sengbhalang kin ai ka jingia trei lang.
Une u Nongialam Sengbhalang u la khot la wer ia ki nongialam ba kin mih shakhmat ban ai ka jingkyrshan ia ka Seng Samla Nongpoh Proper ban kyntiew ia ka Berchem Cup na kawei ka snem sha kawei pat.
Ha kane ka sngi, la sam ruh ia ka khusnam bad trophy sha ki nongjop jong ka lympung.
Ha ka jingialehkai ki shynrang, ka kynhun Monarch kala ioh rah ia ka song pisa ba T.70 hajar lem bad ka trophy katba ka Nongpoh kala ioh ia ka song pisa ba T.40 hajar lem bad ka trophy.
Ha ka jingialehkai ki kynthei, ka kynhun Dubakh kala ioh rah ia ka song pisa ba T. 40 hajar lem bad ka trophy katba ka SYM kala ioh rah ia ka song pisa ba T. 20 haje lem bad ka trophy. Nalor kine, la sam ruh ia ki khusnam shimet sha ki nongialehkai kiba tbit duh.
