Tura, Iaiong 27: U Myntri Sorkar Barim ka jylla u James P. K Sangma uba long ruh mynta u Chairman jong ka Meghalaya Infrastructure Development Corporation (MIDC) ula shah thung kum u Chief Advisor jong ka Tura District Cricket Association (TDCA).
Ia katei la pynbna hynne ka sngi saitjaiñ, ha ka ophis treikam jong ka TDCA kaba don ha Alotgre bad la thung ruh ia u Saljagring M. Marak kum u Nongaibuit jong ka Association.
U President ka TDCA u D.D. Shira ula pynpaw ba da ka jingshemphang jong u James bad u Sajagring kin iatai bad shimkhia ban kyntiew ia ka jingialehkai Cricket ha ka rilum Garo kaban long ka kabu ksiar ban kyntiew ia ka sap ka phong jongki khynnah ialehkai Cricket.
Ka TDCA kadei ka kynhun kaba la bna nam ha ka thaiñ, kaba ju pynlong man la ka por ia ka jingiakob ialehkai Cricket bad ki jingai jinghikai ia ki khynnah ba kin pyntbit ialade ha hapoh ka Alotgre Cricket Ground.
Da ka jingtrei shitom kane ka Association kala lah ruh ban pynmih ia ki nongialehkai Cricket kiba tbit kiba la mihkhmat ia ka jylla Meghalaya ha ki Tournament jong ka BCCI.
Halor kane ka jingshah thung kum u Chief Advisor ka TDCA, u James PK Sangma ula ong, ba yn shimkhia ha kaban kyrshan ia ka jingangnud jong ki khynnah bad ki samla kiba ialehkai Cricket ha ka thaiñ.
