La kot palat 35% ka jingthep vote ha ki Jylla North East
New Delhi : Da ki million ki nong India kila sdang ia ka jingthep vote hynne ka sngi Thohdieng ha ka Phase-II jong ka Elekshon Lok Sabha katba u Myntri Rangbah Duh ka Ri Narendra Modi, u dang pyrshang ban khring ia ki nongthep vote da ka sain pyrthei lyngba ka niam Hindu.
Ki padbah kila mih ban ieng lain ha man ki Polling Station naduh ka por 7 baje mynstep bad la khmih lynti ba ka jingpoi thep vote kan nang kiew katba nang iaid ka por.
Ka jingmih na kane ka jingthep vote hynne ka sngi Thohdieng, ka longkaba kongsan bha ia ka Bharatiya Janata Party (BJP) ba ialam da u Modi namar haduh 88 tylli ki constituency na ki 13 tylli ki Jylla kila iathep vote ba kynthup ia ki Jylla kiba ka BJP ka khlain bha kum ka Rajasthan, Madhya Pradesh, Uttar Pradesh bad Maharashtra.
Kiba bun kila antad ba u Modi bad ka BJP kin khur ia ka jingjop, kaba la iakhun pyrshah ia ka kynhun synrop ba ialam da ka Indian National Congress bad ki seng riewlum kiba khlain.
U Nongialam ka Congress Rahul Gandhi ula iakhun na Wayanad Constituency ka Jylla Kerela ha ka sien kaba ar, hadien ba ula shah pynrem ha ka elekshon 2019 ha ka Smriti Irani, ka Nongialam BJP na Amethi, ka ktem jong ka Iing u Nehru-Gandhi.
Kiwei pat ki kyrtong kiba pawkhmat bha ha kane ka Phase-II jong ka elekshon ki kynthup ia u Shashi Tharoor jong ka Congress, ka MP ka BJP bad actress Bollywood Hema Malino bad u Arun Govil, uba ak ia ka phlim Ramayana.
Kumjuh ruh ka jingiathep vote ha ki 7 tylli ki constituency jong ki Jylla ka thain Shatei Lam Mihngi kala iaid shaid shaid mynta bad kat kum ka jingkhein bala ai da ka ECI, ka jingthep vote ha kine ki lai tylli ki Jylla ka thain kala kot ia palat 35%.
Ki 7 tylli ki constituency kiba leit sha ka elekshon jong ka Phase-II ha NE ki kynthup ia 5 tylli ha Assam bad mar kawei ha Manipur bad Tripura.
Kat haduh ka por 11 baje, ka jingiathep vote ha Assam kala kot ia ka 27.43%, ha Manipur kala kot 33.22% bad ka Tripura kala kot 36.42%.
Ha Assam, ka jingpoi ki nongthep vote haduh ka por 11 baje ka long Darrang – Udalguri: 28.81%, Diphu: 30.82%, Karimganj: 29.99%, Nagaon: 25.29%, Silchar: 23.20%
