Shillong, Iaiong 22 : Arngut ki Khynnah Kynthei kiba dang hapoh ka 16 snem ka rta, kila ngam jyllop hapoh ka Wah Rilang kaba don ha ka thain Mawkyrwat, South West Khasi Hills.
Kine ki khynnah kynthei ki dei na ka Shnong Wahsiej bad la tip kyrteng ia ki da ka heprit Shabakmenlang Wanniang ba 16 snem ka heprit Aishabankmen Thongni ba 14 snem ka rta.
Kat kum ka khubor Pulit la iathuh ba kane ka jingjia kala jia hapdeng ka por 2 baje haduh 2:30 baje eiei. La ong ba kine ki Khynnah kila leit iajngi pyn pynngad ha kane ka Wah namar ka jingshit kyrang ka bneng.
Ki iathuh ba ka jaka ba kine ki khynnah ki ngam jyllop ka dei kaba la tip kum ka thwei Breimeirit, kaba jngai kumba 7 Km na Mawkyrwat.
Namar ka jingkyrpad jongki bahaiing hasem, ki bor District kila pyllait noh ia ka post mortem bad ia ka met la aiti noh sha ki bahaiing hasem ba kin pyndep ia ka lehniam lehrukom kaba khatduh.
