Shillong, Iaiong 17 : U State President ka National People’s Party (NPP) bad Symbud Myntri Rangbah Bah Prestone Tynsong ha ka sngi Ba-ar ula ong ba kan long leh noh ei ban vote ia ka congress namar kala paw shai kdar ba kan sa kut ka shong ha ka Liang Pyrshah hadien kane ka elekshon Lok Sabha.
Ula kynthoh ia kane haba kren na ka rynsan ialap elekshon kaba long ha Laitumkhrah, ka ktem jong ka kyrtong ka NPP bad Myntri Sorkar Kong Ampareen Lyngdoh.
U Bah Prestone ula iathuh ia ki paidbah ba ki nongshongshnong ka Shillong Parliamentary constituency kila phah ia u MP Bah Vincent H Pala sha Parliament haduh lai samoi da ka uniform ka congress.
“Hynrei, ka NPP ha kane ka kynti kala rai ban iakhun namar kam don jingmut ia ki paidbah ban vote ia ka congress naba kala shai kdar ba kan sa kut ka shong ha ka Liang Pyrshah” ula ong.
Haba pynpaw ba ka Congress kala nang troin ha man ki Jylla, u Bah Prestone ula ong ba ka congress kala ngam bad ki nongialam ba hakhlieh duh jong ka, kila nang iamih na ka party, ka don ka dei namar ba ka dei ka iing kaba iapait iapra.
U Bah Prestone ula ther ruh ia u Bah Pala halor ka jingiohthiah lyngngai ia ka kam Citizenship Amendment Act (CAA) ka ba la ktah ym tang ia ka Meghalaya hynrei ia baroh kawei ka thain Shatei Lam Mihngi.
“Ha u snem 2019, ha ka por ba ka Sorkar Pdeng ka wanrah ia ka Citizenship Amendment Bill (CAB), u Bah Pala ula iohthiah lyngngai halor kane ka ishu namar ba um don ha ka bor. Ka Meghalaya ha ryngkat kiwei ki Jylla NE kila sakhi ia ka jinghuri hura kylleng ki jaka ha utei u snem namar kane ka ishu” ula ong.
Ula ong khatduh, baroh ki seng sain pyrthei ka NE kila iakynduh bad kila pynkhamti ia ka kam ha u President ka NPP bad Myntri Rangbah ka Jylla Conrad K Ssangma ba un pan por ban iakynduh ia ka Sorkar Pdeng ha Delhi.
“Kumta ngi la leit sha Delhi bad aiti ia ka shithi sha u Myntri Rangbah Duh bad Myntri kam Pohiing ha kaba baroh ki Nongialam seng sain pyrthei n aka thain, da kawei ka sur kila pynpaw ia ka jingpyrshah kaba jur pyrshah ia ka CAB” ong u Bah Prestone.
“Hadien kata, ngi la iashong jingialang biang bad ki Sengbhalang na kylleng ka Jylla. Hangne ruh ngi la shim ia ka rai. Kumba la rai, u Myntri Rangbah ula ialam ia ka kynhun ki Sengbhalang bad iakynduh ia u Amit Shah. Ka jingmih n aka jingialang ka long kaba sngewtynnad bha bad u Amit Shah ula kular ba ka Meghalaya kan lait noh na ki kyndon jong kane ka Ain” ula bynrap.
Haba kyrpad ia ki paidbah ba kin vote ia ka NPP, u Bah Prestone ula ong “Ngi donkam ban pynjop ia ka kong Ampareen khnang ba kan long ka sur jong ki paidbah ka Shillong Parliamentary constituency bad kan long ruh kum ka pyrnon hapdeng ka Jylla bad ka Sorkar Pdeng” ula ong.
Ula kyntu ruh ia ki paidbah ba kim dei ban sngap ia ki seng sain pyrthei ba dang shu kha shen kum ka Voice of the People Party (VPP) namar kin ym lah ban wanrah ia kano kano ka jingkylla hapoh ka Jylla.
“Kumno phin (VPP) wanrah ia ka jingkylla ha Delhi, lada phi kwah jingkylli sdang shuwa nangne namar phi don 4 ngut ki MLA” ula ong.
“Nga sngew synei ia ki nongkyrshan ka VPP namar wat ka jingpynjop haduh 4 ngut ki MLA ia ki, ka roi ka par kam dei shuh ka nongrim treikam jong ki ym kumba long ha ka por ba ki wan pan jingkyrshan na ki paidbah hashuwa ka elekshon MLA” ula ong.
“Nga sngew synei ruh ia ki nongkyrshan ka VPP namar kane ka party kala pynman ialade tang kum ka jingkieng ia u paidbah ba kin mih sha surok ban pynlon gjingialang hynrei phin nym shem ia ka roi ka par ha surok, phi wan sha Secretariat bad tied ia ka jingkhang u Bah Prestone, tied ia ka jingkhang u Conrad, tied ia ka jingkhang ka kong Ampareen (na ka bynta ki kam pynroi ha ki constituency jong phi) ym na surok”.
 ka ba la ktah ym tang ia ka Meghalaya hynrei ia baroh kawei ka thain Shatei Lam Mihngi.){kind=link}