Shillong, Iaiong 17 : Ka jingialap elekshon jong ki seng sain pyrthei sha ka elekshon Lok Sabha kan kut mynta ka sngi Balang ha ka por 4 baje janmiet, kaba long 48 kynta hashuwa ka jingsdang thep vote la 19 tarik Iaiong.
“Ki kynta ba jar jar (silence period) kan sdang naduh mynta ka sngi ha ka por 4 baje janmiet (17 tarik Iaiong)” ong u Chif Electoral Officer (CEO) Dr BDR Tiwari haba iakren bad ki nongthoh khubor hadien ka jingleit jurip ia ka Electronic Media Monitoring Cell ha ka Ophis ka DIPR.
Ula ong ba ki seng sain pyrthei kin ym lah shuh ban pynlong ia ki rally ne kino kino ki jingialap elekshon lait noh tang ka jingleit rung thliew iing ban iakynduh ia ki briew.
“Ka jingialap ne jingiakren para marwei kan don hynrei ym lah pat ban pynlong ia ka jingialap da ki seng sain pyrthei ha kine ki kynta ba jar jar” ong u Tiwari.
Ki don hynriew ngut ki kyrtong ba aireng na Shillong Parliamentary constituency bad kine ki dei u MP ka Congress Bah Vincent H Pala, kyrtong ka NPP kong Ampareen Lyngdoh, kyrtong ka RDA Robertjune Kharjahrin, kyrtong ka VPP Dr Ricky AJ Syngkon bad ki kyrtong shimet Prof Lakhon Kma bad Peter Challam.
Haba kylli, u CEO ula pyntip ba ka EC kala ioh pdiang ia palat 60 tylli ki jingujor ba pynkhein ia ka Model Code of Conduct lyngba ka C-Vigil bad kiwei kiwei.
“Kumta, ngi la shimkhia ia kine ki ujor bad ngi la pan ia ka kaiphod, ki don ki kam ba ngi la tohkit bad bun ngi la shem ba ki khlem pynkhein ia ki kyndon ka MCC” ong u Tiwari.
Ha kajuh ka por, u CEO u pyntip ba haduh 4,700 ngut ki briew kila jied ban thep noh nala ka jong ka thliew iing.
