Shillong, Iaiong 13: Ka Shad Suk Mynsiem kaba lai sngi jong ka Seng Khasi Kmie, kala sdang hynne ka sngi Saitjaiñ ha kaba palat 400 ngut ki nongshad kynthei bad shynrang, kila hiar ba kin iuh kjat ha lympung shad kaba don ha Weiking Jaiaw.
Ia kane ka shad la sdang shwa na Iing Seng na Mawkhar Shillong, ha kaba ka kynhun ki duhalia kila tem ia ka ksiang lumpaid bad hadien kane la pynbud pat da ka jingdwai kaba la ialam da Vice President ka Seng Khasi Kmie u Rangbah P.D Nongrum bad ia ka jingialang la pyniaid ia ka da u Assistant General Secretary ka Seng Khasi Kmie u Bah Paia B Synrem.
Hadien kane, ki nongshad kila mih na iing seng ban iaid kjat sha lympung Weiking, ha kaba shwa ban sdang ia ka shad ka kmen, la ioh ia ka nguh ka dem ka dwai ka phirat ba la ai da u Rangbah Skor Jala uba long u Chairman ka kynhun u Tymmen U San ka Seng Khasi Kmie.
Ynda la pyndep ia ka nguh ka dem, u President ka Seng Khasi Kmie u Rgh O. Pyngrope ula pynher ia ka lama jong ka seng bad hadien kane la sdang ia ka shad ka kmen.
Kum ban shu pynkynmaw, kane ka shad ban ai nguh aidem ia la u Blei Trai Kynrad u Nongthaw u Nongbuh, la juh pynlong ia ka man la ka snem kaba ha kane ka kynti kaba mynta, ka dei artad ka shad kaba 113.
Ha kane ka shad kaba lai sngi lynter kadei kaba la paw bad bna nam ka jong ka kum kawei na ki la riti kaba nylla jong ka Bri u Hynniewtrep u Hynniewskum, kaba long kum ka dak ban ai nguh ai dem ia la u Blei Trai Kynrad halor ki jingkyrkhu ba u la theh sei bad ruh ba un iai theh sei ia ka kyrkhu ka kyrdoh sha u khun bynirew.
Ia ka Shad Suk Mynsiem la ju pynlong nyngkong ha ka shnong Mawkhar, ia kaba la kynriah noh pat ia ka sha lympung Weiking bad ba kala iai neh syndon haduh kine ki sngi ki por ba mynta.
