Nongpoh, Iaiong 12: Ban pynkhie im biang ia ka tamasa ban kyntiew ia ka kam rep sohshan (strawberry) hapoh ka jylla, ka tnad Horticulture ryngkat ka tnad Tourism, kila pynlong biang ia ka Strawberry Festival 2024 kaba ar sngi lynter ha ki lai tylli ki District ka Jylla ba kynthup ia ka Ri Bhoi District, East Khasi Hills bad West Garo Hills.
Ia ka tamasa kaba la sdang mynta ka sngi ha Ri Bhoi District, la pynlong ha ka shnong Sohliya kaba la tip ruh kum ka Strawberry Village ha kaba u Vijay Kumar D. (IAS), Commissioner Secretary ka tnad Tourism, u la wan ban plie ia kane ka tamasa kum u kongsan ha ka jingiadonlang ruh u Bah O. Lyngkhoi, Rangbah Shnong ka Sohliya lem bad kiwei kiwei ki heh ophisar.
Kane ka tamasa kala long ruh ha ka shnong Syntung, East Khasi Hills bad ha ka shnong Darechikgre, West Garo Hills.
Kine ki tnad Sorkar ha kane ka kynti kila iatreilang bad ka Opus Production bad ka Meghalaya Grassroots Music Project, ban pynpaw nam ia kane ka tamasa ha ka Jylla.
Ha kane ka tamsa kila don ruh shibun ki jingpynbyrngia naduh ka jingiaid kjat, ka jingniah cycle, ki jingialehkai jong ki khyllung khynnah, ka jingiohlad ruh ban leit kheit ia ki soh strawberry na ki farm ha kane ka shnong bad ruh ka jingdon jong ki dukan die jingdie kiba die ia ki soh strawberry, ki wines, ki umsoh bad ka bam bapher bapher.
Haba kren kum u kongsan hadien ka jingwan ban jurip bad ban mad ia ka jingthiang bad jingbang jong u sohshan na kawei ka farm sohshan, u Vijay Kumar D u la pynpaw ia ka jingkmen kaba khraw ban ia don bynta ha kane ka tamasa ban kyntiew ia u soh shan bad ban kyntiew ia ka ioh ka kot jong ki nongrep ia u ne u soh hapoh ka jylla Meghalaya.
U la ong ruh, ba ka jingiatreilang hapdeng ka tnad Horticulture bad ka tnad Tourism kan kyntiew bha ia ki nongrep kiba rep ia shibun ki mar rep kiba lah ban ioh ia ka jingiohnong na ka jingwan ia shimbynta jong ki nongwan jngohkai pyrthei na kylleng ki ri bad ki jylla bapher bapher bad ka jingiatreilang jong kine ki ar tylli ki tnad treikam sorkar kan pynmyntoi shikatdei ia ki paid nongrep jong kane ka jylla.
