Shillong, Iaiong 12 : Ka Meghalaya Human Rights Commission (MHRC), hynne ka sngi Thohdieng, kala pan kaiphod na ka Sorkar Jylla halor ka jingshah pyniap u nongbylla bar jylla mynsngi mynshai ha Mawlai Mawroh, kaba jia ha ka step 10 tarik Iaiong.
Kat kum ka kyrwoh, ka MHRC ka pyntip ba kala shim suo moto case halor kane ka jingshah pyniap une u nongbylla bar jylla.
La pyntip ba ka Commission kala phah notice sha u Director General of Police (DGP) ba bthah ba un aiti ia ka Action taken Report (ATR) hapoh ka 15 sngi.
Ha ka step 10 tarik, uwei u nongbylla bar jylla ba kyrteng u Arjun Ray, ula shah shoh dusmon ha ka kynhun ki runar, kaba lam sha ka jingiap.
Kane ka jingjia kala jia ha Umsohkhlur, Mawlai Mawroh ha ka por 11 baje mynstep. La ong ba kane ka jingjia kala jia ha kawei ka Iing ba dang shna, kaba bylla da une u bar jylla lem bad uwei pat u paralok uba la mynsaw na ka jingshah pduh da u lyngka na ka khlieh.
Ki Pulit kila register case ia kane ka jingjia ha Mawlai Police Station bad ka jingtohkit mynta kala iaid shaid shaid.
