Tura, Iaiong 12: Haduh 16 ngut ki samla Garo na Meghalaya, kiba la shah thok ha ka jingkular pyniohkam ha Mumbai, kila lait mynta na ka kti ki riewshukor bad kila don ha lynti ban wanphai noh shala iing.
Ia kane ka pyntip da u Myntri ka Tnad Pule Puthi Rakkam A Sangma lyngba ka jingthoh ha Social Media, haba ai khublei ruh ia u Myntri Rangbah ka Jylla Conrad K Sangma halor ki jingkyrshan bad jingpynbeit ia ki lad ki lynti ban lah wan ialam noh ia kine ki samla sha Jylla.
U Myntri ula ai khublei ruh ia ki Ophisar na Mumbai bad ka Jylla Meghalaya halor ka jingiatreilang ban leit pyllait ia kine ki samla na ki riew shukor.
Kine ki samla kila ngop ha ka jingpynbiej jong uwei u briew ba kyrteng u Pijush R Marak, uba la tyrwa sha ki ia ki kam ha ki kyrdan bapher bapher hapoh kawei ka kompani thok.
Lah ban kdew ba kala don ruh ka ejehar bala mudui pyrshah ia u Pijush haba sdang jong une u bnai, kaba iadei bad kane ka kam thok kam shukor.
U Myntri ula kren halor ka jingkongsan ban husiar bad phikir bha ialade haba iadei bad ki jingtyrwa aikam aijam namar ka jingdon bun ki nongpynap shrip. Ula kyntu ruh ba ki dei ban da pynthikna bha shuwa ia kine ki lad iohkam hashuwa ba kin shim ia kano kano ka rai.
