Athiabari, Hahim, Iaiong 11: U Myntri Rangbah ka Jylla Conrad K Sangma ula ong ba bun ki shnong kiba la hap mynta sha khappud Assam kila kwah ban pynrung biang sha Meghalaya bad ka Sorkar MDA-2 ka tip bha ia ka jingdawa jong ki bad dei namar kata ka daw ba la iakren bad pynlong ia ka sorjamin lang (joint survey) khnang ban lah pynbeit ia ka kam.
U Myntri Rangbah ula kren ia kane na ka rynsan ialap elekshon ban pan jingkyrshan ia ka kyrtong ka NPP Kong Ampareen Lyngdoh, ha ka jingialang kaba long ha ka thain Athiabari, West Khasi Hills, hynne ka sngi Palei.
“Ngi la leh ia ka jingiapynbeit hangne hangtai bad ka lad ka lynti kala don ban pyrshang ha kaban wanrah pat ia kito ki shnong ba kin long noh shibynta jong ka Meghalaya. Hynrei ngam lah ban batai palat ia kane namar ka sorjamin ka dang iaid mynta bad kane ka dei ka por elekshon” ong u Conrad.
Ula ong ruh ba ka kam kala iaid sted bha bad ka jingleh sorjamin ha kaban pynithuh ia ki mawpud jong u pud u sam ha kiba bun ki jaka.
U Conrad u pyntip ba ka Sorkar kala aiti ruh ia ka thup kyrteng ki shnong jong u snem 2012 sha ka Assam ba iadei bad ki shnong kiba kwah ban wan sha ka jylla Meghalaya.
U Myntri Rangbah ka Jylla ula kynnoh ia ka Sorkar barim jong u snem 2012 namar ka jingbym lah ban kynthup ia ki kyrteng jong ki shnong kiba kwah ban wan phai sha Meghalaya ha ka por ba ka aiti ia ka map bad ka thup kyrteng sha ka Assam ha utei u snem.
Kane ka Sorkar u 2012 ka dei kaba la ialam da ka Congress hapoh ka jingialam u Myntri Rangbah barim Mukul Sangma.
“Haba iakren mynta, ki don bun tylli ki Shnong kiba hap hapoh ka Assam kila dawa ban wan noh sha Meghalaya. Ka jing eh ia nga ka long ba ka Sorkar Meghalaya jong u snem 2012, kala pynithuh bad jied ia ki shnong, shna ia ka map bad aiti ia ki sha ka Sorkar Assam. Kila ieh ia kine ki shnong” ong u Conrad.
U Myntri Rangbah ula ong ba kane ka dei ka jingeh kaba khraw bha kaba u iakynduh ha ka jingiakren bad ka Assam.
“Ka Sorkar Assam mynta kala ong ba kine ki shnong kim dei kiba la dawa da ka Sorkar ha katei ka por, kumta balei ban dawa mynta?. Kumno ngin lah ban ai ia ki shnong kibym shym don ha ka map bala aiti sha ngi da ka Sorkar Meghalaya?”.
Hynrei ula ong pat ba wat hapdeng kine ki jingeh, ka jingkyrmen ka dang don ha kaban lah pynbeit pat ia ka da ka jingia kren sngewthuh bad ka Assam.
“U Myntri Rangbah ba mynta jong ka Assam u dei uba sngewthuh, uba tip bha ia ka thain Shatei Lam Mihngi bad u mynjur ba ia kane ka jingeh dei ban hap pynbeit. Ula trei shitom ha kane ka bynta bad dei namar kata, ba bun bah na ki shnong jongngi kiba la don mynshwa sha Assam, kila wan phai pat sha Meghalaya” ula ong.
U Conrad ula kynnoh ia ki seng sain pyrthei ba don ha ka Liang Pyrshah kiba pyrshang ban khein dewthala ia ki jingiakren pynbeit pud bad pynsaphriang ia ki khana lamler halor ka kam khappud tang ban pyniashrut hapdeng ki ar Jylla bad ka jingsngew iapher hapdeng ki paidbah.
“Ka jingeh hi ka iai neh ba kumno ngin lah ban wanrah pat ia kito ki shnong ki bym shym la shah kynthup ha ka thup kyrteng u snem 2012” ula ong.
 khnang ban lah pynbeit ia ka kam.){kind=link}