Shillong, Iaiong 10: Ka Thma U Rangli Juki (TUR) hynne ka sngi Balang kala pynrem jur ia ka jingshah pyniap uwei u nongtrei bylla bad ka jingshah thombor jong uwei pat kaba la jia ha ka shnong Mawlai Mawroh.
Katkum ka kyrwoh na ka Nongialam ka TUR ka Kong Angela Rangad kala ong ba kane ka jingjia kala jia hadien ba kala don ka jingthombor kaba la palat liam ha Ichamati bad kumjuh ruh ka jingbyrngem byrsit ia ki nongtrei bylla ha Sohra.
“Ki kam thombor kum kine ki long ka jinglehraiñ ia ka imlang sahlang baroh kawei bad baroh ki briew kiba don ia ka pyrkhat pyrdaiñ kaba bha ha ka jylla Meghalaya kidei ban pynrem bad ban dawa ba dei ban kem mardor ia kitei ki runar” la ong ka Kong Angela.
“Ngi donkam ban khot ia ki nongmihkhmat ki jong ngi bad ia ki nongialam sengbhalang kiba pyndonkam ia kitei ki jingjia kum ka jingai ding ban don ka jingisih bad jingshun bad ban buh jingkylli kylla ia ka rukom iaid ka aiñ kaba pynngnat ia kitei ki runar” la ong ka nongialam ka TUR.
“Ngi donkam ban pyrkhat bha ba da kaba leh bym suidniew ia kum kitei ki jingjia jong ka jingthombor kan lam sha ka kolshor jong ka jingpyllait khlem da pynshitom bad ka kam thombor kan ioh ban synshar da ki kynhun jong ki runar bad kane kan ktah lut ia ngi baroh. Kumno ki ritpaid ki shah leh ha ka imlang sahlang kadei ka dak kaba pyni shai kdar ia ka jinglong jong ka imlang sahlang hi” kala ong.
