Shillong Iaiong 10: U MLA ka seng BJP u Bah Sanbor Shullai hynne ka sngi ula pynrem ia ka jingpyniap ia ki nongbylla bar jylla kaba la jia ha Ichamati bad ha Mawlai Mawroh.
“Kine ki jingja ym tang ba ki pynthohbria ia ka dur jong ka jylla hynrei ia ka imlang sahlang hi baroh kawei” ong u Bah Sanbor Shullai ha ka kyrwoh khubor.
U Bah Sanbor ula ong ba ka sorkar jylla kadei ban leh da kaba tyngeh pyrshah ia kino kino kiba donkti khlem da shah liang la kadei ka jingpyniap ia ki bar jylla ne ia ki trai jylla.
Ula ong ba ka aiñ ka long kumjuh ia baroh bad ym don mano mano ruh kiba don ia ka hok ban shim ia ka aiñ ha la ki jong ki kti.
“Shen ngin leit iakynduh ia u Myntri ka Sorkar Pdeng u Amit Shah ha kaba iadei bad ka jingshah pyniap khah khah ki mynsiem kiba lui lui bad ngan kyrpad ia u Amit Shah ban phah shuh shuh ia ki pulit ban pynthikna ba kan don ka shongsuk shongsaiñ ha ka thaiñ” la ong u Bah Sanbor ha ka kyrwoh.
Une u Nongialam ka BJP ula kyntu ruh ia ki kynhun bapher bapher ba kino kino ki jingiakhih ki jongki kidei ban long kiba jai jai.
