Shillong, Iaiong 08: Namar ka jingnang jan ki sngi sha ka elekshon ha Meghalaya, ki artylli ki seng sain pyrthei ba iatreilang hapoh ka NDA-BJP bad NPP, kila iakynduh kyrpang ha ka 7 tarik Iaiong ha Tura, ban iatreilang ha kaban pynthikna ia ka jingjop jong ka Agatha K Sangma na Tura Lok Sabha seat.
Ha ka kyrwoh, ka BJP kala ong “Kaei kaba pynlong kyrpang ia kane ka jingiakynduh ka dei ka jingiatreilang kaba long naduh ka kyrdan kaba heh duh, ha kaba ia ka BJP la ialam da u State President Rikman G Momin bad ia ka NPP la ialam da u Myntri Rangbah Conrad K Sangma dalade”.
Kala ong ba ka jingialang ha Tura ka dei ka sien kaba ar hapdeng ki Nongialam ba hakhlieh jong ki artylli ki party , kaba bud ruh hadien ka jingialang kaba la long shen ha Shillong.
U Myntri Rangbah ka Jylla Conrad K Sangma ula pynkynmaw haka jingialang ia ka jingiadei kaba iajan ba u don bad u Myntri Rangbah Duh ka Ri, ka jingiadei kaba iaid palat phew snem, bad kdew ruh ba man ki vote ia ka kyrtong NDA ka dei ka jingpynthikna ia ka jingshaniah ki paidbah ia u Narendra Modi, ka jingpyrkhat kaba iahap bad baroh ki nongtrei jong ka BJP hapoh ka Jylla bad ka Ri.
Haba ai jingkren, u Conrad ula ai ka jingiaroh ia u Rikman G Momin, uba la trei shitom ban wanrah ia ka jingiatreilang kaba iaid beit iaid ryntih. U President ka BJP Meghalaya marwei, ula trei shitom ha kaban pynthikna ia ka jingjop jong ka NDA kaba dei ban long ka nuksa ia baroh.
Ha kane ka jingialang la wan iashimbynta da baroh arngut ki MDC ka BJP ba kynthup ia u Bernard Marak bad u Benedict Marak nalor palat 300 ngut ki nongtrei jong ka party.
U President ka BJP ula kyntait ia ka khubor bala pynmih da kawei ka kot khubor ba kam ba ka jingpdiang ia ki arngut ki MDC ka BJP ka dei ka kynhun bala buh da ka BJP kum ka jingsiew kylliang ban kyrshan ia ka Agatha Sangma ha ka por elekshon.
Ka BJP kala thalain ruh ia u Nongialam ka TMC Mukul Sangma uba la kynnoh ba u kyrtong ka Congress Vincent Pala u dei u nongprat lynti ban don ka jingiatreilang hapdeng ka BJP-NPP-Congress ha Meghalaya.
