Shillong, Iaiong 04: Ka Khasi Students Union (KSU) hynne ka sngi Palei, kala kren da kaba shai kdar ba ka seng Vishwa Hindu Parishad (VHP) kam dei ban wan tuklar eiei ia ki kam hapoh ka bri u Hynniewtrep namar ka KSU kam ju tuklar ia ki kam kiba ka VHP ka leh ha ka ri thor.
“Ngi kwah ban phah ia ka kyrwoh kaba shai sha ka VHP kaba la phah da ka jingthoh sha ka President ka ri India, ba ngim ju tuklar ia ka kam jongka, kaba ka leh ha ka ri thor jong ka India. Namar kata, ka VHP ruh kam dei ban wan tuklar ia ki kam ki jam hapoh ka bri u Hynniewtrep” ong u General Secretary ka KSU samla Donald V Thabah haba iakren bad ki nongthoh khubor.
Une u Nongialam ka KSU ula ong ba ka VHP kam dei ka seng kaba mih na kane ka ri Khasi. Kane ka seng kam dei ban tuklar eiei ruh em ha kaba iadei bad ka jinglong jingman ha kane ka bri u Hynniewtrep.
U samla Donald ula ong ba ka VHP lad aka kam ba ka peit ia baroh ki Nongshongshnong kiba don hapoh Ri India, kam dei ban peit tang ia kita ki mynder ri kiba ioh ia ki kot ki sla da ka lynti ka bym dei. U ong ba ka dei ban peit ruh ia ki trai ri trai muluk.
“Lada ka VHP ka sngew ba ka don shisha ia kata ka jingkitkhlieh ia ka jinglong jingman ha kane ka jylla jong ngi, kadei ban tehlakam shwa ia kito ki bar jylla kiba dei ki dkhot ka VHP kiba iaid rally ha sor Shillong mynshem snem ha Laban ha ka sngi u Blei, kiba ïeng hakhmat ka Grace Covenant Church bad Laban Presbyterian Church bad hylla ‘Jai Shri Ram’ bad ki kyntien shit niam nlor ki kyntien byrngem byrsit ia ki paradoh parasnam jong ngi kiba dang don Jingiaseng” ong u samla Donald.
“Lada kam lah ban leh eiei ia kane, ka mut ba kadei tang ka seng kaba peit tang ia ka bha ka miat jongno re jongno bad ka KSU hi kam tieng kam smiej bad kan ym ailad hi ruh ia kine ba kin wan ban pynduh mynsiem ban thombor ia ki paradoh parasnam ki nong ngi” ula bynrap.
Ha kaba iadei bad ka jingthmu jongka Meghalaya Minority Linguistic Development Forum (MMLDF) ban pynlong ia ki jingiakhih halor ka jingshah pyniap bad jingshah ban beiñ ki bar jylla, u General Secretary ka KSU ula ong, “Ka MMLDF ka la ong ban pynlong ia ka jingiakhih, hynrei na ka liang ka seng KSU kan ym shong kli kti bad lada ki iakhih halor ka jingshah ban beiñ kita ki parajait ki jongki ne ki para nongbuhai shnong ki jongki, ma ngi ruh ngi hap ban ia mih lang ban iakhih halor ka jingshah ban beiñ ki paradoh parasnam ki jong ngi na ka por sha ka por ia kaba ngin ym lah shuh ban jer”
 hynne ka sngi Palei, kala kren da kaba shai kdar ba ka seng Vishwa Hindu Parishad (VHP) kam dei ban wan tuklar eiei ia ki kam hapoh ka bri u Hynniewtrep namar ka KSU kam ju tuklar ia ki kam kiba ka VHP ka leh ha ka ri thor.){kind=link}