Thalain u Bah Prestone ia ka VPP | Nga pan ia ka Blueprint, phi jubab ba nga la tynmen palat?

Shillong, Iaiong 02 : U President ka NPP Meghalaya bad Symbud Myntri Rangbah Bah Prestone Tynsong ha ka sngi Ba-ar, ula ther tyngeh ia ka Liang Pyrshah Voice of the People Party (VPP) namar ka jingbym nud ban sei ia ka ‘blueprint’ ban pynshisha ba haduh katno ka ieid ia ka Jaidbynriew.

“Nga la pan ia ka blueprint ban pynshisha ia ka jingieid jong phi (VPP) ia ka Jaidbynriew hynrei phi jubab pynban da kaba ong ba ia nga yn ym pdiang satia ha ka VPP namar ba nga la tynmen?” ong u Bah Prestone haba kren na ka rynsan ialap elekshon ka NPP ha Ladthadlaboh, Jowai, West Jaintia Hills District.

“Hooid, nga lah ban dei uba la tynmen bad nga lah ban dei uba syllen hynrei to ngan kylli ia phi ba haduh katno phi sngew khynnah ialade” ula kylli ia u President ka VPP Bah Ardent M Basiawmoit.

Ula pynkynmaw ia u Bah Ardent ba “Ngi la iatreilang kum u MLA ha u 2008 bad 2013 hynrei nga kwah ban tip kaei ka synniang jong phi, sngewbha iathuh ia nga”.

Une u President ka NPP ula maham ia ki paidbah ba kim dei ban shah pynngop ha kum kine ki seng sain pyrthei, ki bym don satia ia ka blueprint.

Halor ka jingkynnoh pyrshah ia ka Sorkar MDA ba ialam da ka NPP, u bah Prestone ula ong ba wat hapdeng kane, ka party kala nang khlain nang khlain ha Meghalaya. “Na ka 19 seat ha u 2019, mynta ngi la don 26 ngut ki MLA hadien ka elekshon 2023” ula ong.

Haba kren halor ki kam jong ka Sorkar Jylla, u Symbud Myntri Rangbah ula ong ba dei tang ka Sorkar MDA ba ialam da ka NPP kaba nud ban leh eiei halor ki ishu kiba kynrum kynram kum ka jingiapynbeit khappud, ka them metor bad kiwei kiwei.

Haba kyrpad ia ki paidbah ban vote ia ka VPP, u Bah Prestone ula ong ba kan dei ka khyllipmat ba sngew sarong ia ki paidbah ka Ri-lum Khasi bad Jaintia lada ka Longkmie Khasi ka leit ban mihkhmat bad long ka sur jong ki ha Parliament. “Kumta, vote ia ka kong Ampareen” ula ong.