Shillong, Iaiong 02 : U President ka National People’s Party (NPP) ka Jylla bad Symbud Myntri Rangbah Ban Prestone Tynsong ha ka sngi Ba-ar, ula ong ba ka NPP kala shim ia baroh ki nongialeh pyrshah kum ki jingma ha kane ka elekshon Lok Sabha ban wan.
Haba iakren bad ki nongthoh khubor, u Bah Prestone ula ong “Ka Elekshon hi ka dei ka elekshon.. Ngi don hynriew ngut ki kyrtong na Shillong Parliamentary seat, ngam ong ba ka jingma ka dei ka VPP ne kiwei kiwei ki political party, ka jingma ka long ia baroh ki kyrtong, ki dei kiba khlain”.
Hynrei ula ong ba ki Nongialam bad nongkitkam ka NPP kila trei shitom ban pynthikna ia ka jingjop jong ka kyrtong ka party Kong Ampareen Lyngdoh.
Haba pynpaw ba bun ki briew kila wan iasoh sha ka party hashuwa ka elekshon, u bah Prestone ula ong “Ngi dang shu wan phai na Jowai ha kaba bun ngut ki nongialam kila wan ban iasoh bad ngi bad ym tang ha Jowai, nga tharai ba u Working Presdient ruh u la pdiang ia ka NPP”.
“Ngan iathuh ia phi ba ha Shillong bad Tura parliamentary seat, nga thikna ba ha kine ki seat, ngin ioh beit ia ka jingjop” ula ong.
