Shillong, Iaiong 01: Ka Mawlai SC lyngba ka Hat Trick jong u Donlad Diengdoh kala pynrem kput ia ka Sawmer SC da 7-2 kol ha ka jingiakhun ha ka Shillong Premier League 2023 kaba la long hynne ka sngi Nyngkong ha SSA Stadium, First Ground, Polo.
U Donlad Diengdoh ula ioh thep ia ka hat trick ha kaba ula ioh thep ia ka kol kaba nyngkong ha ka minit kaba 22, ka kol ka baar ha ka 24 minit bad iaka kol kaba lai ha ka minit kaba 57.
Katba kiwei pat ki nongialehkai ka Mawlai kiba la ioh thep kol ki kynthup ia u Robert Khongriah ha ka minit kaba 34, u Fairming Suting ha ka minit kaba 74, u Kevin Rymbai ha ka minit kaba 75 bad u Dajiedlang Wanshnong ha ka minit kaba 86.
Katba ka Sawmer kala ioh thep 2 kol lyngba u Diego Khriam ha ka minit kaba 10 bad u Mark Austin Wanswett ha ka 88 minit.
Kane ka jingjop ka Mawlai kala pynlong ia ka ban don ha ka kyrdan kaba nyngkong jong ka SPL da kaba ioh khur 7 point bad ka dang don ha kti sa kawei ka jingiakhun.
Mar ia sdang ka jingiakhun, ka Mawlai kala shah thep ha ka Sawmer hynrei kane kam shym la pynduh mynsiem ia ki rangialehkai ki jongka hynrei kila bteng ban ialehkai bha bad kila ioh ban thep 3 kol ha ka kylla step bad ka jingiakhun kala kut da 3-1 kol.
Haba la sdang ka kylla miet ka Mawlai kala ioh thep sa 4 kol bad hashwa ban kut artad ka jingiakhun ka Sawmer kala ioh ban thep shi kol bad ka jingiakhun kala kut ha kaba ka Mawlai kala ioh thep 7 kol bad ka Sawmer 2 kol.
Ka jingiakhun ha ka sngi Baar kan long hapdeng ka Nangkiew Irat SC pyrshah ia ka Langsning ha ka por 3 baje mynsngi.
