Shillong Lber 23: U Myntri Rangbah ka jylla u Conrad K Sangma hynne ka sngi Saitjaiñ, ula ong, ba ka Sorkar Jylla kan leh da kaba tyngeh pyrshah ia kito kiba pyrshang ban pynthud ia ka shongsuk shongsaiñ ha ka jylla.
“Ki pulit kila trei shitom bha ha ki snem kiba la dep bad kila buh ruh ia la ka jingim ha ka jingma bad kila ioh kem ruh ia bun ngut bad kila don ruh bun jait ki jingshah byrngem byrsit hynrei kila lah ban tehlakam noh bad ki pulit kila trei palat por ban pynthikna ba ki briew kiba donkti ha kaban pynthud ia ka shongsuk shongsaiñ ha ka jylla kidei ban shah pynshitom da kaba tyngeh” ong u Conrad haba iakren bad ki nongthoh khubor.
U Myntri Rangbah ula ong, ba ka sorkar kan ym khein sting bad hynne ka sngi ula lum ia ka jingialang halor ka jinglong jingman ha ka jylla ha kaba la donlang u Myntri ka kam pohiing ka jylla u Bah Prestone Tynsong, u Chief Secretary ka jylla u Bah D.P Wahlang bad u DGP ka jylla u Dr LR Bishnoi.
“Ngi la shimkhia ia ka kam ban pynthikna ba lada ka long kumno kumno ruh, baroh kiba donkti ne kiba pyrshang ban pynthud ia ka shongsuk shongshngaiñ, ngin leh da kaba tyngeh ia ki” la pynkut u Myntri Rangbah.
