Tura, Lber 22 : Ki Pulit ka South Garo Hills, kila ioh ban pyllait im ia u mechanic jong kawei ka kompani shna surok, uba shah rahbor ha ka kynhun ki runar kiba la aipor lai sngi ia ka kompani ban siew ia ka pisa ba T.50 lak.
Ia une u mechanic la ioh pyllait napdeng jong kawei ka khlaw. Une u mechanic u kyrteng u Akhilesh Chauhan ba na Lucknow, Uttar Pradesh.
Une u mechanic ula shah rahbor na ka jaka shna jingkieng kaba don hajan ka shnong Karukom, Siju, South Garo Hills, myn ha ka miet 19 tarik.
Tang hadien katto katne kynta ba rahbor, kine ki runar kila phone ia ki bahaiing u Chauhan ha UP bad dawa pisa ba T.50 lak ban pyllait ia u haba aipor ruh lai sngi ba kin aiti ia ka pisa, ka ban kut mynta ka sngi.
Ki Pulit kila pynlong ia ka jingkhynra ha ka miet sngi Palei bad kila lap ia ka jaka rieh jong kine ki nongrahbor kaba don hapdeng jong ka khlaw, kaba jngai kumba 10 Km eiei na ka jaka ba rahbor.
Ha kane ka jingkhynra, ki Pulit kila ioh kem ia arngut ki nongrahbor katba arngut pat kila ioh phet. Kine ki runar ki dei kiba ju don jingiadei bad ki kynhun kaikhlaw.
Kiba shah kem ki kyrteng u Wilban M Sangma ba na Durabanda Songgital, South Garo Hills bad u Withmil S Marak ba na Upper Dosogre, South Garo Hills.
Ki Pulit kila register case pyrshah ia kine ki arngut ha Siju Police Station.
