Shillong, Lber 20 : U Symbud Myntri Rangbah ka Jylla ba khmih ia ka kam pohiing (Police) Bah Prestone Tynsong, ula bthah iaka seng Hynniewtrep National Liberation Council (HNLC) ba kan wan sha ka miej jingiakren naba ka Sorkar ka long kaba la khreh ban leh ia kano kano ka kam kaba long palar ia u pud ka ain.
Kane ka jingkynthoh kala mih hadien ba ka HNLC kala kam ia ka jingbahkhlieh halor ka jingpynbthei bomb IED myn ha ka 9 tarik Lber ha Them Iew Mawlong bad aipor ruh shibnai ia ka Sorkar Jylla ba kan pynkynriah ia ki 342 tylli ki Longiing na Them Metor.
Haba iakren bad ki nongthoh khubor hynne ka sngi Balang, u Bah Prestone ula ong ba um kwah satia ban kynthoh ia ka jingkren ka HNLC hynrei ym duna ia ka 3-4 snem mynta, ka kam ban pynkynriah ia ka Them Metor ka dei kaba la shimkhia bha da ka Sorkar Jylla.
“Ym tang katta, ngi la pyrkhat katlah kat iai ruh ban poi sha ka jingiabeit haba iadei bad kane ka kam” ula ong.
U Bah Prestone ula ong ba shibun ki jingialang la dep ban pynlong bad ka Harijan Panchayat Committee (HPC). “Ha ka jingshisha, mynta, kane ka kam ka dang don hapoh ka jingbishar ka Iingkashari Meghalaya High Court. Ka dei ka ban dang shim rai da ka Iingkasahri bad ngi dang ap ia ka jingialang ba khatduh ba ngi dei ban iakynduh (hapdeng ka Sorkar bad HPC” ula ong.
“Ha ka jingshisha, ngi la dep kyntu iaki dkhot ka HPC ba kin pynpaw ia ka por, ka sngi jong ka jingialang namar ngi kwah ban iakynduh. Ym tang ban shu iakynduh hynrei ka Iingkashari ruh kala dep pynpaw ba dei ban pynbeit noh ia kane ka kam kham kloi kat kaba lah bad lada ym lah, ka Iingkashari kan shim hi iala ka jongka sienjam” ula bynrap.
U bah Prestone ula ong “Namar kata, nga khmih lynti ba shen, ngin sa lah ban iakynduh biang, iashong bad ka HPC bad hadien jong kane, ngin sa lah ban shim ia ka rai halor ka lynti ban iapynbeit”.
Haba kylli halor ka nongrim jong ka Sorkar pyrshah ia ki kam ka HNLC, u bah Prestone ula ong ba ka Kynhun ka dei ban wan phai biang sha ka lynti jong ka jingiakren iasuk.
“Nga iathuh biang ha phi ba nga dang kyrpad biang ia ki ban pynbteng ia ka jingakren, pyrkhat shispah sien namar mynta na ka liang ka Sorkar ngi la long kiba la pynkhreh, kano kano kaba long palat ia u pud ka ain, ka ain hi kan shim iala ka jong ka lynti. Ka jingbthah ka long kaba shai, lada dei mano mano ba donkti, la ka dei ka HNLC ne mano manor uh, ngin ym shah ia kum kine ki kam bymman ba kin jia hapoh ka Jylla Meghalaya” ula ong.
Ka sleeper cell jong ka HNLC dang shen kala shah kyndang da ka jingioh kem ia 4 ngut ki dkhot na Ri-Bhoi District. Ka jingtohkit jong ki Pulit ka pynpaw ba ka jingthmu jong kane ka sleeper cell ka long ban pynbthei shuh shuh ia ki bomb IED ha Shillong bad Nongpoh.
U Symbud Myntri Rangbah ula ieng skhem ha ka nongrim ba ka Sorkar kan nym aili satia iakum kine ki kam bymman ba kin jia hapoh ka Jylla ka la long kumno kumno ruh.
