Shillong, Lber 21: Ym pat don mano mano ruh napdeng ki kyrtong kiba la thep kyrteng ban iakhun ia ka elekshon Lok Sabha na Shillong bad Tura parliamentary seat, hynne ka sngi Balang kaba sdang ka sngi thep kyrteng hadien ka jingpynmih jingpynbna ka ECI ia ka elekshon.
“Ym pat don mano mano ruh ba thep kyrteng na baroh artylli ki constituency ban iakhun ia ka elekshon Lok Sabha kaba hap ha ka Phase-I” ong ki bor pyniaid elekshon ha Jylla.
Ka khubor ka iathuh ba ka kyrtong ka NPP Kong Ampareen Lyngdoh kan sa leit thep kyrteng ha ka 22 tarik u Lber katba u kyrtong ka RDA Bah Robertjune Kharjahrin un thep ha ka 26 tarik u Lber.
Kiwei pat ki kyrteng jong ka Shillong parliamentary seat ki kynthup ia u MP ka Congress Bah Vincent H Pala, u kyrtong ka VPP Dr Ricky AJ Syngkon bad u kyrtong shimet Prof Lakhon Kma.
Ka BJP haduh mynta kan dang ban pynbna ia u/ka kyrtong ha baroh artylli ki constituency-Shillong bad Tura.
Ki kyrtong ban iakhun na Tura ki kynthup ia ka MP ka NPP Agatha K Sangma, u MLA ka Congress na Gambegre Saleng A Sangma bad u MLA barim ka TMC Zenith M Sangma.
