Shillong, Lber 19 : Ka Iingkashari Meghalaya High Court kala aipor 45 sngi ban kit lut ploin ia u dewiong ba pyllang ha kylleng ki jaka madan, sha ka jaka ka ban lum lang na ka bynta ban khaii.
Ha ka hukum bala pynmih halor ka PIL ba shong bishar myn ha ka 14 tarik Lber, ka Full Bench kala ong “Ngi sngew ba baroh u dewiong bala dep tih bad ula don ha madan madiah, u dei ia kaban pynkit noh sha ka jaka kaban lum lang na ka bynta ban khaii. Ia ka bai pynlum lang lah ban pan na ki trai dewiong namar ka jingpynbuh ia u dewiong ha kane ka jaka”.
“Shisien bala pynkit ia une u dewiong, da kaba pyndonkam ia ki drone kumba ai jingmut u Justice Katakey (retired), baroh kine ki jaka kin hap hapoh ka jingpeit pyrman, lada shem ia ka jingmih biang u dewiong ha kane ka jaka, lah ban shim ia u kum u dewiong ba tih beain kat kum ka kyndon 21 jong ka MMDR Act, 1957 bad lah ruh ban leh eiei pyrshah ia u” kala ong.
Halor ka jingkyrpad u Aadvocate General, ka Iingkashari kala mynjur ban aipor 45 sngi ban pynkit ia baroh une u marpoh khyndew uba la shu buh ha kylleng ki jaka madan.
