Shillong, Lber 18 : Ki Kyrtong ba iakhun ia ka elekshon Lok Sabha na Shillong Parliamentary Constituency, ha ka sngi Nyngkong kila iashimbynta ha ka Symposium halor ka phang Parliamentary Politics and Political participation, bala pynlong da ka Sankardev College.
Kine ki kynthup ia u kyrtong ka Regional Democratic Alliance (RDA) Robertjune Kharjahrin, kyrtong ka Voice of the People Party (VPP) Dr Ricky AJ Syngkon, kyrtong shimet Prof Lakhon Kma. La wan iashimbynta ruh da u Secretary ka Congress Emanuel Badwar bad u Nongaiktien ka BJP bah M Kharkrang.
Hynrei, u MP ba mynta ka Congress Bah Vincent H Pala bad kyrtong ka NPP bad Myntri Sorkar Kong Ampareen Lyngdoh ki khlem wan iashimbynta satia ha kane ka jingialang.
Ka Elekshon sha ka Iingdorbar Lok Sabha ba 18 kan long ha ka 19 tarik Iaiong ha Jylla Meghalaya.
Haba ai jingkren, u kyrtong ka RDA Robertjune Kharjahrin ula kular ia ki paidbah ka Ri-lum Khasi Jaintia ba lada u shah jied kum u MP, un iai buddien bad ka Sorkar Pdeng ban pyntreikam noh mar mar ia ka Inner Line Permit (ILP) ha Jylla Meghalaya.
U ong ba ka nongrim jong ka RDA ka long ban iada ia ka bha ka miat jong ki trai ri trai muluk bad ki nongshongshnong ka Jylla.
“Ka thong jong ngi ka long ban pyntreikam ia ki lai tylli ki P kata ban iada (protect), pynneh pynsah (preserve) bad kyntiew (promote) bad ban pynurlong ia kine, nyngkong eh ngi donkam ban iada ialade bad dei na kata ka daw ngi kwah ban kular ha phi ba lada phi jied ia ka RDA, ngin sa pynsngewthuh ia ka Sorkar ban pyntreikam noh ia ka ILP ha Meghalaya” ula ong.
Haba kular ban iada ia ka jingburom ia ki niam bapher bapher hapoh ka Ri, u Robertjune ula ong “Ngin sa pynthikna ia ka hok ban mane blei kum ka hok tynrai jong baroh uwei pa uwei bad kane kan iai neh ha India. Ngin ym shah iano iano ruh ban iuhroit ia ka hok jong ngi”.
Nalor kane, ula ong ba ka RDA kan iai buddien bha ruh bad ka Sorkar Pdeng ba kan pynkloi noh ia ka jingpynrung ia ka ktien Khasi ha ka khyrnit ba phra jong ka Riti Synshar ka Ri India nalor ban pynbeit noh ia ka jingiakajia pud hapdeng ka Meghalaya bad ka Assam bad ban bishar biang ia ka soskular jong ka jingiapynbeit pud ka kylla ba nyngkong hapdeng ki ar Jylla. Ula ong ba ka RDA kan kyntu ruh ia ka Sorkar Pdeng ban shong bishar biang ia ka jingiapynbeit pud hapdeng ka India bad Bangladesh ban iada ia ka hok jong ki trai Jylla.
Haba kren halor ka roi ka par, une u kyrtong ka RDA ula ong ba un pynthikna ba ka Office Memorandum kaba kular 44% ka jingioh bhah thungkam ia ki ST ha ki Ophis Sorkar kin treikam kumba ki dei ban long nalor ban buh ruh ia ka economic zone ban pynthikna ba ki trai shnong kin ioh kam 100% ha ki Groud C bad D.
U Kyrtong shimet Prof Lakhon Km aula ong ba ula pyrkhat sani bha shuwa ban shim rai ban iakhun ia ka elekshon MP ha kaban mihkhmat ia ki paidbah jongki 7 tylli ki District ka Ri-lum Khasi Jaintia ha Parliament.
Ula ong ba um kyrshan satia ia ki nongrim jong ki seng sain pyrthei bapher bapher ha Jylla bad pynkynmaw ba bun na ki MP ba mihkhmat ia ka Shillong ki dei ki kyrtong shimet. Ula ai nuksa ia u Bah GG Swell uba la jop 4 sien ia ka elekshon MP kum u kyrtong shimet bad pynliem ia ka congress bad ki seng riewlum.
Haba ther ia ka Sorkar ba ialam da u Modi ha Delhi, u Prof Kma ula ong “Nga sngew ba lada ki (BJP) wan biang ha ka bor, ngam tip shuh kiei ki jingkylli kiba kin wanrah pat. Wat ialehkai bad ka Riti Synshar jong ngi. Katba phi dang burom ia ka riti synshar, ngi dang long kawei ka ri. Nga don ha ka University bad nga iohi ia kum kiei ki jaid briew bala phah sha ka University, ka dei ka juh ka jingmut jingpyrkhat ka ban jia ha kano kano ka jaka bad nga dap da ka jingsngewkhia ia kane”.
“Phi donkam ban phah ia u briew uba lah ban ieng ha Iingdorbar marwei bad ban bthah ia ka Sorkar ba sngewbha wat ym ialehkai bad ka riti synshar ka ri namar kane ka riti synshar ka tehsong ia ngi kum kawei ka ri. Ka sngi kaba phi ialehkai bad ka riti synshar, kane ka ri kan sa pait sa pra lyngkhot lyngkhot bad namar kata, kim dei ban ktah ia ka nongrim ban burom ia baroh ki jait niam kiba don hapoh ka Ri” ula ong.
U Kyrtong ka VPP Dr Ricky AJ Syngkon ula pynpaw ia ka jingsngewkhia halor ka jinglong jingman ba mynta jong ka Jylla Meghalaya wat hadien 52 snem ka jingioh Jylla la ka jong.
Haba kren halor ki kaiphod jong ki agency bapher bapher, ula ong “Ka long kaba sngewbha bad ba pynduh mynsiem namar ka Meghalaya ka dei ka Jylla ba duk tam. Ka Shillong, kaba ju bna nam kum u jaka pdeng ka pule puthi, hynrei shano ngi poi mynta, ngi lah don ha trai eh. Haba kren ia ka koit ka khiah, ngi don ha trai duh”.
U Nongaiktien ka BJP Bah M Kharkhrang, ula kren halor ki skhim bapher bapher bala pyntreikam da ka Sorkar Pdeng. Ula ban jur ruh ba ka Sorkar Pdeng kala wanrah ia ka prokram Nasha Mukht Abhiyan ban iakhun pyrshah ia ka jingjyllei u droks bad jingdih droks kata ktah ia ki samla jong ka thain Shatei Lam Mihngi bad ka Ri baroh kawei.
 Robertjune Kharjahrin, kyrtong ka Voice of the People Party (VPP) Dr Ricky AJ Syngkon, kyrtong shimet Prof Lakhon Kma. La wan iashimbynta ruh da u Secretary ka Congress Emanuel Badwar bad u Nongaiktien ka BJP bah M Kharkrang.){kind=link}