Shillong, Lber 15: Wat hadien baka Sorkar kala khein be-ain, ki samla ba kamai kali arshaka hynne ka sngi Saitjain kila pynbna ban bteng beit iaka jingkamai niah thuk thuk ha nongbah Shillong.
Kine ki samla kamai arshaka haka lama Ride to Serve kila shim ia kane ka rai haka jingialang bala pynlong ha Madan Malki.
Haba kren shaki lad pathai khubor u samla Kyntiew Nongkynrih ula iathuh ba naduh ki snem bala dep, ka kynhun kala leit kynduh ia u District Transport Officers (DTO) ban pan jingbit lane Permit hynrei haduh mynta ka tnat Transport lane naka ophis DTO kam pat jubab satia.
Ula iathuh ba ki don palat 300 ngut ki samla kiba kamai jakpoh daka ba niah kali arshaka ha Shillong hynrei kane ka jingpynbna beain ka Sorkar kan ktah iaki haka liang ka kamai ka jih.
“Ka Jylla ka don hapdeng ka jingkyrduh kam, hynrei ka long kaba thamula ba ka Sorkar ka pynbna beain ia ngi kiba pyrshang ban ieng hala ki jong ki kjat daka kamai daki arshaka” ong u samla Kyntiew.
Ula ong ba haka taiew ban wan, ka kynhun kan sa leit kynduh ia u Myntri ka tnat Transport ka Sorkar Jylla bad ia u Chief Secretary, ban dawa ia ka Sorkar Jylla ba kan ai jingbit ne Permit ia ki ba kin ioh kamai biang khlem kano kano ka jingshah pynwit haka ain.
