Shillong Lber 15: U Myntri Rangbah ka Jylla u Conrad K Sangma, hynne ka sngi Thohdieng ula aiti ia ki kot ki sla jaka sha ka Varun Beverages na ka bynta ban tei iaka karkhana pynmih Pepsi ha Mendipathar, North Garo Hills.
Haba kren ha ka jingialang ha Mendipathar, u Conrad K Sangma, ula ai khublei ia u Chairman jong ka Varun Beverages u Ravi Jaipuria, halor ka jingshim rai ban seng ia ka karkhana ha Mendipathar bad ula ong ba katei ka jingshim rai kala pyniaid shakhmat ia ka jingwan seng kam ki kompani ha ka jylla bad ka jingseng iaka karkhana ha Mendipathar kan wanrah ia ka jingkylla ha ka jingim jong ki paidbah ha ka thaiñ.
Ula pynpaw ruh ia ka jingsngewnguh ia ka MIDC kaba la pyndep ia ki kam ki jam ha kaba iadei bad ka jingaiti ia ki kot jaka puta ha ka por kaba lyngkot bha.
U Myntri Rangbah ula ong ba ka Mendipathar Industrial Growth Centre la dep ban pynbna kum ka Industrial Area ha ki snem kiba la dep hynrei kam shym la don satia pat kano kano ka kam pynroi ha katei ka thaiñ la bun snem.
“Da ka jingseng ia ka Industrial Unit ban song ia ki umsoh kum ka Pepsi, Mirinda bad kiwei kiwei, yn pynkylla ia ka jingim jong ki paidbah bad ki trai shnong kin iohkam iohjam’ ong u Conrad.
Ula pyntip ba ia ki umsoh la dih beit man la ka sngi bad kidei kiba la song ha ka jylla Assam ne West Bengal.
“Da ka jingdon kane ka Bottling Unit ha Mendipathar ngi lah ban dih ia kine ki umsoh kiba la song hi hapoh ka jylla jong ngi” ula ong bad ka bynrap ba ka kompani ha ki snem ban wan, kan wad ruh ia ki lad ki lynti ban song ia ki umsoh bad ia kiwei kiwei ki mar kiba la pynmih hi da ki trai jylla kum u sohtrun.
U Myntri Rangbah ula pyntip ba ka kompani kan bei T.185 Klur ia katei ka projek bad yn pyndep hapoh ka 12 bnai.
Katei ka Bottling Plant nalor ka jingsam ia ki mar kiba pynmih sha ki paidbah ka jylla Meghalaya, kan shalan ruh sha ki jylla kiba marjan.
Ha katei ka jingialang la iadonlang u MLA ka Mendipathar u Marathon Sangma, u CEO ka Varun Beverages u Kamlesh Jain bad ki ophisar jong ka MIDC.
