Shillong, Lber 13 : U Nongialam ka Congress Legislative Party (CLP) Bah Ronnie V Lyngdoh ha ka sngi Balang, ula kynnoh ba ka All India Trinamool Congress (AITC) bad ka Bharatiya Janata Party (BJP) kila don ka “jingiapynbeit ba sopsop” mynta kaba jia hashuwa ka jingwan ka elekshon Lok Sabha.
Haba kynthoh ia ki jingkren jong u Nongialam ka AITC bad Myntri Rangbah barim Dr Mukul Sangma, u Bah Ronnie ula ong ba haba ianujor bad ka West Bengal kaba don 42 tylli ki Lok sabha seat, ka Meghalaya ka don tang 2 tylli ki seat.
“Kumta lada ki (AITC) ong ba ngi la jam shakhmat ban pynbna ia ki kyrtong jong ngi ha Meghalaya ka ba dei ka daw b aka AITC kam kwah ban iatreilang bad ngi, balei ba kim pynbna pat ba kila poi sha ka jingiasngewthuh jingmut ban iasam ia ki constituency ha West Bengal” ong u Bah Ronnie.
“Mynta, ba kim kwah ban iatreilang bad ka Congress, ngi kwah ban buh jingkylli ia ki nongialam ka AITC ba hato phi la don ka jingiasngewthuh jingmut bad ka BJP. Hato ka don ka jingiapynbeit sopsop hapdeng ka TMC bad BJP ban pharia ia ki vote, ki briew, kiba kwah ban iohi ia ka ri synshar paidbah ba burom ia baroh ki niam kum ka INDIA ka pynrem ia ka BJP” ula bynrap.
Une u Nongialam ka Liang Pyrshah ula ong “Mynta, to ngin buh ia ka jingkylli balei ba ka TMC, kaba dei shibynta jong ka INDIA Block kala poi mo sha ka jingiasngewthuh jingmut ba iasam ia ki constituency hapoh West Bengal?”.
“Lad aka AITC kala leh ia kane ha West Bengal, lehse ngi ruh ngin jin da la leh lang kumjuh ha Meghalaya ne dei ba don ka jingiasngewthuh jingmut bad ka BJP khnang ba ki vote ka Liang Pyrshah kin iapait iapra bad iohnong ei ka BJP” ong u Bah Ronnie.
“Namar mynta ka BJP ka sngewthuh shai ba ka West Bengal ka don bun bha ki vote jong ki rit paid. Kumta lada ki iawanlang, baroh ki vote rit paid kin leit sha ka party kaba dei jong ka INDIA bloc. Kane hi ka pyni ba don shibun kiei kiei ha lyndet tang ban ioh kynnoh ia ka Meghalaya kaba don tang 2 seat bad ka West Bengal kaba don 42 seat” ula bynrap.
U Bah Ronnie ula ong “Lada 2 seat ki long kongsan ia ka AITC bad ka 42 seat kim da long kongsan, nga sngew ba kane ka kren shai ia ka jinglong arsap”.
Nalor kane, une u Nongialam ka Congress ula ong “….phi la iohi ia kiwei ki Nongialam ka Liang Pyrshah, phi iohi ia ki CBI, ED bad IT kila pynset along bad kem ia ki. Hynrei ha West Bengal ym ju don satia kum kane. Kumta nga kylli ia kane ka jingkylli la ka don mo ka jingiasngewthuh jingmut ba sopsop hapdeng ka BJP bad ka AITC”.
