Shillong, Lber 11: Ka Iingkashari Magistrate kala aibor 10 sngi ia ki Pulit ban tohkit ia ki arngut ki briew ba kem halor ka jingsuba donkti pynbthei bomb ha Them Metor, Iew Mawlong, kaba jia ha ka miet sngi Saitjain.
Ia kane la pyntip da u Superintendent of Police Rituraj Ravi hadien ka jingwan ialam tian bishar ia kine ki arngut hynne ka janmiet.
Kine ki arngut ki kyrteng u Ebakordor Nongpluh ba 26 snem, uba dei na West Jaintia Hills lem bad u Bah Tarson Lymba ba 58 snem uba dei na West Jaintia Hills.
U iathuh ba ia u Ebakordor la kem na Shillong katba ia u Tarson Lymba la kem na Dawki.
U Bah Tarson Lymba u dei u Nongialam ka seng Hynniewtrep National Youth Front (HNYF) uba bat ia ka kam Disciplinary Secretary ka Seng.
U dei ruh uba ju ialam lynti ia ka kynhun iakren iasuk jong ka Sorkar haba leit shaw ia ki Nongialam ka HNLC kiba wan sha ka miej iakren iasuk ha ki bnai bala leit noh.
U Superintendent of Police u pyntip ba ka jingtohkit mynta ka dang iaid shakhmat.
