Gangtok, Lber 10 : Ka Sikkim Democratic Front (SDF) kala wanrah lang ia ki seng sain pyrthei bapher bapher lem bad ki National party jong ka Jylla ban mynjur ia ka resolution ha kaban pynjari noh da ka President Rule hapoh Sikkim.
Ka Liang Pyrshah ka kynthup ia ka BJP, ka Sikkim Pradesh Congress Committee bad kiwei ki Seng Sirewlum. Kine ki seng Liang Pyrshah kila iakynduh hynnin ka sngi ha Gangtok bad shim ia kane ka rai.
Kine ki party ki sngew ba ka jingsuk bad ka jingshngain dei ban wanrah biang khnang ba lah ban pynlong ia ka elekshon kaba khuid ba suba. “Kawei ka lynti ka long ban don noh da ka President Rule hapoh ka Article 356 hapoh ka Jylla Sikkim” kila ong.
Kane ka Liang Pyrshah kan pynlong ruh ia ka peace rally ha ka 11 tarik Lber ban pynpaw ia ka jingpyrshah halor ka jingthombor ia u Lamphang barim KN Rai jong ka Sikkim Legislative Assembly.
“Baroh ki seng sain pyrthei kila mynjur ba ka jinglong jingman ka suk ka sain ha Sikkim kala synjor bad ki paidbah ka Sikkim kila shong ha ka jingsyier bad jingshah byrngem.
Kane ka long namar ka jingiai bteng ki kam umsnam kiba la jia ha kine ki san snem bala leit noh” ong u Nongialam ka SDF Prem Das Rai.
