Shillong, Lber 10: Ka jingbthei ba suba dei u bomb IED, kala pynshong syier ia ki paidbah kiba sah hajan ka Them Metor ha ka miet sngi Saitjaiñ.
Kane ka jingbthei kala jia ha ka por 10:30 mynmiet eiei hajan ka Syndicate Bus Stand hajan Them Metor, la iathuh u SP ka East Khasi Hills u Rituraj Ravi.
Ula ong ba katei ka jingbthei kala jia ha kawei ka jingkertin kaba don ha katei ka jaka hynrei donbok ba ym shym la don ba mynsaw haduh ba lum jingtip mynta.
“Ka jingjulor kala long tang ha katei ka jaka kaba don ka tin bad ki katto katne ki jingkhang iit kiba don marjan. Ngi dang ap ban ioh ia ki jingtip kiba pura halor kane ka jingja” ong u Ravi.
“Katkum ki jingtohkit kaba dang iaid la suba jur ba katei ka jingbthei kadei ka jingbthei jong u IED Bomb, hynrei ka jingtohkit kaba bniah ka dang iaid shakhmat ban lap ia ka jingshisha baroh” ula ong.
Ki tyllong khubor kila iathuh, ba uwei u briew ula mynsaw ha ka tei ka jingjia.
Katei ka jingbthei kala long kaba jur bha, ia kaba la iohsngew ruh da ki briew kiba sah ha ka shnong Umsohsun, Mawkhar, Mission Compound bad kiwei kiwei.
Kawei ka dukan kala shah pynjulor ha katei ka jingbthei.
